El azamattary aty-jónin neshe ret ózgerte alady
ASTANA. KAZINFORM – Qazaqstan zańnamasynda azamattyń atyn, ákesiniń atyn jáne tegin qansha ret ózgerte alatynyna naqty sandyq shekteý qoıylmaǵan. Bul týraly QR Ádilet mınıstrliginiń Tirkeý qyzmeti jáne zańgerlik qyzmetter kórsetýdi uıymdastyrý komıteti tóraǵasynyń orynbasary Dıas Sháripbaı aıtty.
Vedomstvonyń túsindirýinshe, aty-jónin aýystyrýǵa 16 jasqa tolǵan azamat jeke ózi ótinish bere alady. Alaıda ony tek qalaýyna qaraı, eshbir negizsiz ózgertýge bolmaıdy. Ár ótinish jeke qaralyp, zańda kózdelgen dáleldi sebeptiń bar-joǵy tekseriledi.
– «Neke (erli-zaıyptylyq) jáne otbasy týraly» kodekstiń 257-babynda mundaı 13 sebep belgilengen. Olardyń qatarynda atynyń, ákesiniń atynyń nemese teginiń oǵash estilýi ne aıtýǵa qıyn bolýy, ata-anasynyń biriniń ultyna sáıkes keletin atty nemese tekti alǵysy kelýi, sondaı-aq qujattaǵy atynan ózgeshe, ómirde naqty qalyptasqan atyn resmı túrde alǵysy kelýi bar, - deıdi tóraǵa orynbasary.
Sonymen birge elimizdiń azamaty aty-jóniniń bir bóligin ǵana emes, birneshe bóligin qatar ózgertý týraly ótinish bere alady. Mysaly, tegin, atyn jáne ákesiniń atyn bir mezgilde aýystyrýǵa bolady. Biraq mundaı jaǵdaıda da ótinish zańda belgilengen negizderdiń birine sáıkes kelýi qajet.
Osylaısha, bir adamnyń aty-jónin birneshe ret ózgertýine tikeleı tyıym salynbaǵanymen, árbir jańa ótinish boıynsha ózgertýge zańdy negiz bolýy shart.
