El azamattary zeınetkerlikke erte shyǵýy múmkin be – Eńbek mınıstriniń jaýaby

ASTANA. KAZINFORM – Búgin BAQ ókilderimen kezdesken Eńbek jáne halyqty áleýmettik qorǵaý mınıstri Svetlana Jaqypova el azamattarynyń zeınetkerlikke erte shyǵý múmkindigine qatysty pikir bildirdi.

«Óte mańyzdy másele. Kóp balaly analarymyz, múgedektigi bar balalardy asyrap otyrǵan analarymyz zeınetkerlikke erte shyǵamyz ba dep, osy máseleni kóterip otyr. Zııandy óndiriste jumys isteıtin azamattar da mınıstrlik aldyna 50, 55 jastan zeınetkerlikke shyǵý máselesin qoıyp júr. Bul halyqaralyq deńgeıde sheshimin tapqan másele. Aıtalyq, eger zeınet jasyna kelse de, zeınetke shyqpaı, jumysyn ári qaraı jalǵastyrǵan azamattarǵa zeınetaqysyn tólemeı, ony bıýdjette qaldyryp, al zeınet jasyna jetpeı, zeınetke shyqqysy keletin azamattarǵa bıýdjettegi sol qarjyny tóleý qarastyrylyp otyr», - dedi mınıstr.

Onyń aıtýynsha, zeınetke erte shyqqysy keletin azamattardyń eńbek ótili 25 jyldan kem bolmaýy kerek. Sonymen qatar 25 jyl boıy zeınetaqy qoryna aýdarymdary bolýy tıis. Sol kezde ol azamattar zeınet jasyn kútpeı erterek zeınetke shyǵa alady.

«Mysaly, siz 20 jasynan bastap jumys isteseńiz, 25 jyl boıy zeınetaqy jarnasy aýdarylyp otyrsa, 45 jasta shyǵa alasyz. Máselen, sol ýaqytta búgingi kúnmen alyp qarasaq, zeınetaqyńyz 100 myń teńge bolady. Al siz zeınet jasyna jetip, sodan keıin zeınetkerlikke shyqsańyz zeınetaqyńyz 200 myń teńge bolýy múmkin. Biz ár sanatqa esepteý júrgizdik», - dedi Svetlana Jaqypova.

Aıta keterligi, bul másele qazirgi ýaqytta múddeli memlekettik organdar tarapynan talqylanyp jatyr.

Osyǵan deıin Svetlana Jaqypova kolledjderde serjanttar daıyndaıtyn áskerı kafedralar ashýdy usyndy.