El aımaqtarynda «Jasóspirimniń UBT tapsyrýǵa daıyndyǵy kezinde ata-analarǵa psıhologııalyq kómek» konferentsııasy ótedi
ASTANA. QazAqparat - 2015 jyldyń 16 mamyrynda 14 aımaqtaǵy jáne Astana men Almaty qalalaryndaǵy bilim mekemelerinde «Jasóspirimniń UBT tapsyrýǵa daıyndyǵy kezinde ata-analarǵa psıhologııalyq kómek» atty biryńǵaı respýblıkalyq ata-analar konferentsııasy ótkiziledi, dep habarlanǵan QR Bilim jáne ǵylym mınıstrliginiń saıtynda.
Otbasylyq tárbıeleý ınstıtýty Qazaqstan Respýblıkasynyń Bilim jáne ǵylym mınıstrliginiń, «Nur Otan» partııasynyń qoldaýymen, «Jasóspirimniń UBT tapsyrýǵa daıyndyǵy kezinde ata-analarǵa psıhologııalyq kómek kórsetý» atty biryńǵaı respýblıkalyq ata-analar konferentsııasyn ótkizedi.
Aýdandar men aýyldardyń 11 synyp oqýshylarynyń ata-analarymen 1000-nan astam pedagog-psıhologtar jumys jasaıtyn bolady. Bul mamandardyń barlyǵy Otbasylyq tárbıeleý ınstıtýtynyń, QR Bilim jáne ǵylym mınıstrliginiń qoldaýymen júzege asyp otyrǵan, otbasylyq tárbıeleý máselesi boıynsha kásibı biliktilikti arttyrý baǵdarlamasynyń túlekteri bolyp tabylady. Konferentsııaǵa QR memlekettik bilim basqarmalarynyń basshylary, «Nur Otan» partııasynyń ókilderi, mekteptegi dırektordyń tárbıe isi jónindegi orynbasarlary, synyp jetekshiler, mekteptiń medıtsına qyzmetkerleri, mektep psıhologtary jáne 11 synyp oqýshylarynyń ata-analary shaqyryldy.
Konferentsııa barysynda psıhologtar túlekterdiń ata-analarymen UBT tapsyrý barysyna daıyndyq kezinde kezdesetin ata-analardyń orynsyz minez-qulyqtary - beıberekettik, jaýapsyzdyq pen salǵyrttyq, qobaljý men balalaryn qorqytý sııaqty is-áreketteri jaıynda sóz qozǵaıdy. Ata-analarǵa jasóspirimderdiń kúızeliske tótep berýdi joǵarylatý, qysym men qobaljýdy tómendetýge arnalǵan ádis-tásilder usynylady. Psıhologtar balaǵa qalaı jaǵymdy kóńil-kúı týyndatý men óziniń ýaqytyn, kúsh-jigerin tıimdi paıdalana bilýge keńester beredi. Bul elimizdiń ata-analaryna arnalǵan pedagogıkalyq-psıhologııalyq aýqymdy aktsııa UBT tapsyrý barysyna daıyndyq kezeńindegi jasóspirimderdiń ata-analaryna psıhologııalyq kómek retinde, sonymen qatar ata-analardyń kópshiliginde mektepte oqıtyn ózge de balalarynyń baryn eskere otyryp, bilim ordasymen baılanysta bolýlary úshin uıymdastyrylýda.
