El aýmaqtaryndaǵy 26 mln. gektar jaıylymnyń jaǵdaıy tym múshkil
ASTANA. 20 qyrkúıek. QazAqparat -Elimizde 188 mln. gektar jaıylym jeri bolsa, sonyń 26 mln. gektarynyń jaǵdaıy tym tómen.
Búgin QR Parlamenti Májilisinde «Jaıylym týraly» zań jobasy talqylanǵan dóńgelek ústel barysynda Aýyl sharýashylyǵy mınıstrligi Mal sharýashylyǵy departamentiniń dırektory Qanat Ydyrysov osylaı málim etti.
Departament basshysynyń aıtýynsha, búgingi kúni elimizde 188 mln. gektar jaıylym jerler bar. «Onyń ishinde 60 mln. gektary aýyl sharýashylyǵyna qarasty aýmaqtaǵy jerlerde ornalasqan, al 21 gektar eldi mekenderde ornalasqan. Sonymen qatar, atalǵan 81 mln. gektardyń ishinde 26 mln. gektar jaıylym jerdiń jaǵdaıy óte tómen bolyp otyr», - deıdi Q. Ydyrysov. Onyń aıtýynsha, jaıylym jerlerdiń tozýyna birqatar sebepter bar. Atap aıtqanda, elimizdegi jalpy mal basynyń 80 paıyzy eldi mekenderde, jurtshylyqtyń, sharýashylyqtyń ıeliginde ustalady. Sondyqtan da, olar eldi mekenniń aýmaǵyndaǵy 5-7 shaqyrym radıýsta ǵana jaıylady.
«Sonyń saldarynan jaıylymdar taptalyp, ónimdiligi tym tómenge túsip ketken. Bundaı jaıylymnyń tozýy maldyń sanyn arttyrýǵa da, olardyń ónimdiligin kóterýge de keri áserin tıgizedi», - deıdi Q. Ydyrysov. Onyń sózine qaraǵanda, elimizde jaıylymdarǵa qatysty quqyqtyq-retteý máseleleri qamtylmaı, arnaıy zań normalarynyń bolmaýy jaǵdaıdy odan saıyn aýyrlatyp otyr. Al jaıylymdar týraly arnaıy zańdar kóptegen elderde, onyń ishinde AQSh-ta, Qytaıda, Mońǵolııada, Qyrǵyzstanda qoldanylady.
