El aýmaǵynda zańsyz júrgen Qyrǵyzstan azamattaryn qaıtarý tártibi jeńildetildi
ASTANA. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy readmıssııa týraly kelisimdi jáne Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy readmıssııa týraly kelisimdi iske asyrý tártibi týraly atqarý hattamasyn ratıfıkatsııalaý týraly» zań jobasyn maquldady, dep habarlaıdy QazAqparat.
«Kelisimge 2016 jylǵy 17 qazanda Astanada eki eldiń ishki ister mınıstrlikteriniń ókilderi qol qoıdy. Osy qujat eki memlekettiń aýmaǵynda kirý jáne onda bolý sharttaryn buzǵan adamdardy anyqtaýdy jáne qaıtarýdy kózdeıdi. Bul sanatqa elimizdiń aýmaǵyna zańsyz kirgen nemese zańdy kirgenimen elde bolýy tártibin oryndamaǵan nemese ruqsatynyń merzimi ótip ketkennen keıin memlekettiń aýmaǵynda qalǵan adamdar jatady», -dedi QR Іshki ister mınıstri Qalmuhanbet Qasymov zań jobasy boıynsha baıandamasynda.
Onyń sózine qaraǵanda, kelisimdi ratıfıkatsııalaý zańsyz kóshi-qonmen kúresýge múmkindik beredi, eldiń aýmaǵynda zańsyz júrgen adamdardy halyqaralyq quqyqqa sáıkes qabyldaýdy,sondaı-aq olardyń tranzıtin jeńildetedi.
Atap aıtqanda, kelisimniń 3-babynyń 1-tarmaǵynda kórsetilgen adamdardyń readmıssııasy men tranzıtin júzege asyrǵan kezde, sonymen qatar olardy qaıtarǵanda týyndaıtyn barlyq kóliktik shyǵystardy, ıaǵnı eger shyǵystardy atalǵan adamdar derbes nemese úshinshi adamdar tóleı almasa, suraý salýshy tarap kóteredi.
