El aýmaǵynda ýaqytsha ákelingen, salyqty tóleýden bosatylǵan kólikter kóbeıip otyr
Atap ótetin jaǵdaı, kórsetilgen avtomashınalardyń basym kópshiligi Eýrazııalyq ekonomıkalyq odaqtyń (EAEO) kedendik aýmaǵyna Mańǵystaý oblysy boıynsha Memlekettik kirister departamentiniń ótkizý pýnktteri arqyly ýaqytsha ákelingen. Olar óz mártebesi boıynsha sheteldik taýarlar (ıaǵnı EAEO taýarlary bolyp tabylmaıdy) jáne kedendik baqylaýda bolady.
EAEO Kedendik kodeksiniń 264-babynyń 6-tarmaǵyna jáne 275-babynyń 2-tarmaǵyna sáıkes ýaqytsha ákelingen kólik quraldary deklaranttyń (ákelýdi júzege asyrǵan tulǵa) is júzinde ıeliginde jáne paıdalanýynda EAEO kedendik aýmaǵynda bolýǵa tıis.
Alaıda, búgingi tańda Qazaqstan Respýblıkasynyń aýmaǵyna ýaqytsha ákelingen kólik quraldary keden bajdar men salyqtardy tóleýden, kedendik tazartýdan jaltaryp memlekettik tirkeýge qoıylyp jatqan faktiler anyqtalýda.
Mysaly, shetel azamattary jeke paıdalanýyna arnalǵan sheteldik kólikterdi ákelgen soń, Qazaqstan Respýblıkasynyń aýmaǵynan birshama ýaqyttan keıin ketip qalyp jatyr (bular negizinde Grýzııa men Ázerbaıjan azamattary).
Bul kólik quraldary tıesili kedendik bajdar men salyqtardy tóleýsiz Qazaqstan Respýblıkasynyń aýmaǵynda tirkeýge qoıyp, Qazaqstan azamatyna berý maqsatynda EAEO aýmaǵyna ákelingeni týraly paıymdaýǵa negiz bolap otyr.
Qazirgi tańda QR QM Memlekettik kirister komıteti kedendik bajdar men salyqtardy tóleýsiz Qazaqstan Respýblıkasynyń aýmaǵyna tirkeýge qoıylǵan 156 kólik quralyn anyqtady.
Osyǵan baılanysty QR QM MKK Qazaqstannyń barlyq azamattaryna ýaqytsha ákelingen kólik quraldaryn tek kedendik bajdar men salyqtardy tólegennen keıin ǵana satyp alýǵa jáne Qazaqstan aýmaǵynda atalǵan kólik quraldaryn paıdalanýǵa bolatynyn eskertedi.
