El aýmaǵynda tolyq kólemde qymbat metaldardy qaıta óńdeý máselesi sheshiletin bolady
ALMATY. 23 tamyz. QazAqparat /Erlik Erjanuly/ - Búgin Ulttyq bank pen Taý-ken óndirý jáne taý-ken metallýrgııa kásiporyndarynyń qaýymdastyǵy Qazaqstannyń jáne Keden odaǵy elderiniń aýmaǵynda ishki altyn naryǵyn damytý jáne qymbat metaldardy qaıta óńdeýdi keńeıtýdi yntalandyrý jáne jaǵdaı jasaý jónindegi ustanymdy qoldaıtyny týraly baspasóz habarlamasyn taratty.
Qazirgi kezde Qazaqstanda «Qazmyrysh» JShS-i kásipornynyń ǵana halyqaralyq «London good delivery» standartyna sáıkes keletin quıma túrindegi tazartylǵan altyndy jasap shyǵarý múmkindigi bar. Al «Qazaqmys» JShS-tegi affınajdy kásiporyn qazaqstandyq standarttarǵa sáıkes keletin tazartylǵan altynnyń quımalaryn shyǵarady. Osy affınajdy óndiristiń qýattaryn paıdalaný birneshe jyldyń ishinde halyqaralyq «London good delivery» standartyna sáıkes keletin quımalar túrindegi tazartylǵan altyn óndirisine arnalǵan ekinshi sertıfıkattalǵan kásiporyndy qurýǵa múmkindik beredi. Sonyń nátıjesinde respýblıka aýmaǵynda tolyq kólemde qymbat metaldardy qaıta óńdeý máselesi sheshiletin bolady.
