El aýmaǵy arqyly ótetin qara jáne tústi metall tranzıtine shekteý qoıylmaq

ASTANA. QazAqparat – Qazaqstan arqyly temir jolmen tasymaldanatyn qara jáne tústi metal synyqtarynyń tranzıtine shekteý qoıylmaq. Bul týraly Indýstrııa jáne ınfroqurylymdyq damý mınıstrligi ashyq talqyǵa shyǵarǵan Úkimet qaýlysynda jazylǵan, dep habarlaıdy QazAqparat tilshisi.

«Mys, alıýmınıı, qorǵasyn, qara metal qaldyqtary men synyqtary, balqytýǵa arnalǵan qara metal quımalary, paıdalanýda bolǵan qubyrlar, relster, temirjol tósemi men jyljymaly quram elementteri, qorǵasyn batareıalary, quramynda qorǵasyn, kadmıı nemese synap bar, hımııalyq túri boıynsha suryptalǵan jáne quramynda qorǵasyn, kadmıı nemese synap joq, suryptalmaǵan jáne quramynda qorǵasyn, kadmıı nemese synap joq tústi metaldardyń Qazaqstan aýmaǵy arqyly tranzıtin 3 jyl merzimge shekteý engizilsin» delingen qujatta.

Shekteý engizilýi yqtımal tústi jáne qara metaldardyń tolyq tizimimen myna silteme arqyly ótip, tanysýǵa bolady.

Qaýlyǵa qosymsha berilgen túsindermede jazylǵandaı, bul jobany qabyldaý áleýmettik-ekonomıkalyq salaǵa jáne ulttyq qaýipsizdikti qamtamasyz etýge teris áser etpeıdi.

Qujat 20 aqpanǵa deıin kópshilik talqylaýda bolady.