El aýmaǵynyń 75 paıyzdan astam jeri ártúrli deńgeıde degradatsııaǵa ushyraǵan - Áshimbetov
ASTANA. KAZINFORM – El aýmaǵynyń 75 paıyzdan astam jeri ártúrli deńgeıde degradatsııaǵa ushyraǵan. Bul týraly Májilistiń jalpy otyrysynda «Topyraqty qorǵaý týraly» zań jobasy men oǵan ilespe qujatty birinshi oqylymda tanystyrǵan depýtat Nurjan Áshimbetov aıtty.
- Atalǵan zań jobalary topyraqty qorǵaý salasynda júıeli memlekettik saıasat qalyptastyrýǵa, ony tıimdi paıdalanýǵa, qunarlylyǵyn saqtaýǵa jáne tozýdan qorǵaýǵa baǵyttalǵan. Qolda bar derekterge sáıkes, Qazaqstan aýmaǵynyń 75 paıyzdan astam jeri ártúrli deńgeıde degradatsııaǵa ushyraǵan. Bul kórsetkishter máseleniń tek ekologııalyq sıpatta ǵana emes, eldiń ekonomıkalyq damýy men ulttyq qaýipsizdiginiń negizderine áser etetin júıeli qaýip ekenin kórsetedi, - dedi depýtat.
Onyń aıtýynsha, búginde Jer jáne Ekologııalyq kodeksterdiń qoldanystaǵy normalary júıeli kózqarasty qamtamasyz etpeıdi. Birtutas tetik retinde jumys istemeıdi.
- Zań jobasynda «topyraq» túsinigi retteýdiń jeke obektisi retinde qarastyrylǵan. Bul rette ony saqtaýdyń biryńǵaı erejeleri, degradatsııadan qorǵaýdyń tıimdi tetigi ázirlenip jatyr. Topyraq - jerdiń bir bóligi ǵana emes, kúrdeli bıologııalyq júıe jáne tutastaı alǵanda búkil ekojúıeniń negizi; onyń jaǵdaıy klımatqa, sý jáne bıoresýrstaryna tikeleı baılanysty. Ǵylymnyń róli de eskeriledi. Óıtkeni ǵylymı zertteýler topyraqta bolyp jatqan protsesterdi tereńirek túsinýge múmkindik beredi. Zań jobalarynyń aıasynda erozııa, sortańdaný, sarqylý, tyǵyzdaný sııaqty topyraqtyń degradatsııa protsesteriniń aldyn alý jáne boldyrmaý sharalary anyqtalady. Topyraq jaǵdaıynyń jerdi qashyqtan baqylaý jáne jasandy ıntellekt tehnologııasynyń málimetterin paıdalana otyryp keshendi monıtorıng júıesin engiziledi, - dedi ol.
Aıta keteıik, palatanyń búgingi jalpy otyrysynda topyraqty qorǵaý, jol qaýipsizdigin tsıfrlandyrý, ańshylyq salasyn retteý, janýarlar dúnıesin saqtaý máselelerine qatysty zań jobalary talqyǵa salynady.
