El aýmaǵyndaǵy iri kólder men ózenderde 5 qutqarý stantsııasy salynady - TJM
ASTANA. KAZINFORM – Keler jyly elimizdiń óńirlerindegi ózender men kólderde 5 qutqarý stantsııasy salynady. Bul týraly Úkimet otyrysynda QR Tótenshe jaǵdaılar vıtse-mınıstri Kegen Tursynbaev aıtty.
- Sý obektilerindegi qaýipsizdikti qamtamasyz etý sharalary kúsheıtildi. Sýǵa batqan azamattardy qutqarýǵa jedel den qoıý úshin qutqarý bólimshelerin salý men olardy jabdyqtaý jumystary belsendi júrgizilip jatyr. Eki jyldyń ishinde sý qoımalarynda 8 qutqarý stantsııasy salyndy (Shalqar, Imantaý, Býrabaı, Úlken Shabaqty, Alakól kólderinde, Esil ózeninde). Kelesi jyly taǵy 5 stantsııa salynady (Jezqazǵan, Qonaev, Semeı, Qosshy qalalarynda, Shortandy kóliniń jaǵasynda), - dedi K. Tursynbaev Úkimet otyrysynda.
Onyń aıtýynsha, qutqarýshylardy materıaldyq-tehnıkalyq qamtamasyz etý kezeń-kezeńmen jaqsaryp keledi. Zamanaýı júrdek káterler men tehnıkalar satyp alynyp jatyr. Jyl saıyn ákimdiktermen birlese balalardy júzýge jáne alǵashqy kómek kórsetýge úıretý is-sharalyr uıymdastyrylyp keledi.
- Soǵan qaramastan, sýǵa shomylý maýsymynda bala ólimi jıi oryn alady, onyń negizgi sebebi – balalardy qaraýsyz qaldyrý. Kóbinese bala óliminiń faktileri kanaldar men aryq júıeleri sııaqty shaǵyn sý obektilerinde tirkeledi. Sondyqtan, múddeli memlekettik organdar ata-analar men balalar arasyndaǵy profılaktıkany kúsheıtýi qajet, - dedi vıtse-mınıstr.
Aıta keteıik, Úkimet basshysy Oljas Bektenov ata-analar balanyń ómirine beı-jaı qaramaı, aralasatyn ortasyn, qyzyǵýshylyǵy men bos ýaqytyn qalaı ótkizetininen habardar bolýy kerek ekenin aıtty.
