El aýmaǵyndaǵy nysandar múgedektigi bar jandar úshin qanshalyqty yńǵaıly
ASTANA. KAZINFORM – Bıyl múgedektigi bar jandarǵa beıimdelgen nysandardyń úlesi 80 paıyzǵa jetkizilmek. Bul týraly Úkimet otyrysynda ınklıýzıvti saıasatty júzege asyrý sharalaryn talqylaý kezinde Eńbek jáne halyqty áleýmettik qorǵaý mınıstri Asqarbek Ertaev málim etti.
- Mańyzdy baǵyt — qoljetimdi orta qalyptastyrý. Búginde qoljetimdiliktiń ınteraktıvti kartasynda shamamen 43 myń obekt tirkelgen. Onyń ishinde 28 500-i nemese 67% nysan tolyq beıimdelgen. Beıimdelý kórsetkishin oryndaý 2024 jyly 53% , 2025 jyly 64% boldy. 2026 jyly bul kórsetkishti 80%-ǵa jetkizý kózdelip, 34 myń ákimshilik, kommertsııalyq jáne áleýmettik obektini qoljetimdi etý mindeti qoıylǵan, - dedi A.Ertaev.
Onyń aıtýynsha, óńirlik deńgeıde beıimdelgen nysandardyń joǵary kórsetkishteri Jetisý (85%), Batys Qazaqstan (79%) jáne Almaty (76%) oblystarynda baıqaldy. Bul rette, Mańǵystaý (51%) jáne Ulytaý (44%) oblystarynda osy jumystardyń qarqyny tómen, sondyqtan ákimdikter jumysty kúsheıtý qajet.
- Arnaýly áleýmettik qyzmetter kórsetý júıesin jetildirý aıasynda ınfraqurylymdy damytýǵa jáne qyzmetterdiń qoljetimdiligin arttyrýǵa basymdyq berilgen. El boıynsha múgedektigi bar eresekter men balalarǵa arnalǵan joǵary tehnologııalyq jabdyqtarmen qamtylǵan 33 ońaltý ortalyǵy jumys isteıdi. Sońǵy 2 jylda Semeı, Taraz, Kentaý jáne Oral qalalarynda 4 jańa ortalyq ashyldy. Osy jylǵy mamyrda Atyraý qalasynda taǵy 1 ortalyq ashylady. Endi 7 ortalyqty salý jáne jobalyq-smetalyq qujattamasyn ázirleý jumystary júrip jatyr (Aqmola jáne Aqtóbe, Jetisý oblystarynda jáne Shymkent qalasynda qurylys, Astana qalasynda, Pavlodar jáne Almaty oblystarynda JSQ ázirleý), - dedi mınıstr.
Budan buryn habarlanǵandaı, bıyl ınklıýzıvti jumyspen qamtý múmkindigi keńeıtiledi.
