El aýmaǵynda sý qoımalaryndaǵy qazirgi ahýal qandaı
ASTANA. KAZINFORM – Sý resýrstary jáne ırrıgatsııa mınıstrligi elimizdiń birqatar óńirlerindegi iri sý qoımalarynan tasqyn sýdy qabyldap, qaýipsiz ótkizý maqsatynda sý jiberilip jatqanyn málimdedi.
Mınıstrlik dereginshe, 30 naýryzdaǵy jaǵdaı boıynsha soltústik, batys, shyǵys jáne ortalyq óńirlerdegi sý qoımalarynda josparly sý bosatý jumystary júrgizilýde.
Aqmola oblysynda Sileti sý qoımasynan sekýndyna 16,74 tekshe metr, Shaǵalaly sý qoımasynan 16,67 tekshe metr sý jiberilýde.
Aqtóbe oblysynda Aqtóbe sý qoımasynan sekýndyna 1 tekshe metr jáne Qarǵaly sý qoımasynan sekýndyna 0,3 tekshe metr sý bosatylyp jatyr. Qazirgi ýaqytta atalǵan eki nysan orta eseppen 37%-ǵa toly.
Shyǵys Qazaqstan oblysynda Buqtyrma sý qoımasynan sekýndyna 315 tekshe metr, al Óskemen sý qoımasynan 421 tekshe metr sý jiberilýde.
Abaı oblysynda Shúlbi sý qoımasynan sekýndyna 661 tekshe metr sý bosatylyp jatyr.
Batys Qazaqstan oblysynda Kırov sý qoımasynan sekýndyna 6 tekshe metr, Bitik sý qoımasynan 7 tekshe metr, sondaı-aq Dóńgelek jáne Pıatımar sý qoımalarynan sekýndyna 2 tekshe metrden sý jiberilýde.
Qaraǵandy oblysynda Yntymaq jáne Samarqand sý qoımalarynan sekýndyna 3 tekshe metrden sý bosatylyp jatyr.
Qostanaı oblysynda Joǵarǵy Tobyl sý qoımasynan sekýndyna 1,1 tekshe metr jáne Qaratomar sý qoımasynan sekýndyna 3 tekshe metr sý jiberilýde.
Soltústik Qazaqstan oblysynda Sergeev sý qoımasynan sekýndyna 15,8 tekshe metr, Petropavl sý qoımasynan 28,16 tekshe metr sý bosatylyp jatyr.
Mınıstrlik tasqyn kezeńinde sý qoımalaryndaǵy jaǵdaı turaqty baqylaýda ekenin atap ótti.
Aıta keteıik, buǵan deıin qaı óńirlerge sý basý qaýpi tónip turǵanyn jazǵan bolatynbyz.