El aýmaǵynda ruqsat etilgen pestıtsıdter tiziminde asa qaýiptisi bar
ALMATY. KAZINFORM – Qazaqstanda sýbsıdııalanǵan pestıtsıdter tiziminde asa qaýiptisi bar. Bul týraly Almatyda ótken Ortalyq Azııa elderinde jasyl aýyl sharýashylyǵyn damytý úshin lastanǵan aýylsharýashylyq topyraǵynyń bıo- jáne fıtoremedıatsııalyq tehnologııalary boıynsha halyqaralyq konferentsııa barysynda FAO pestıtsıdterdi basqarý jobasynyń jetekshisi Saltanat Baeshova aıtty.
Mamandardyń aıtýynsha, pestıtsıdterdi bıologııalyq preparattarmen almastyrý ekologııalyq problemanyń birden bir sheshimi.
«Jobaǵa qatysýshy elderde, sonyń ishinde Qazaqstanda biz tirkeý kezinde kóptegen faktorlarǵa nazar aýdaramyz. Belgili bolǵandaı, elde paıdalanylǵan jáne tipti sýbsıdııalanǵan pestıtsıdter tiziminde asa qaýipti pestıtsıdter bar. Olardy paıdalaný ulttyq zańnamamen retteledi, biraq damyǵan elderde eskerilgen kóptegen krıterııler nazardan tys qalyp otyr. Biz fermerlerge naryqta bar qaýipsiz balamalardy izdeý ústindemiz. Ótken jyly alma baqtary men qyryqqabat, qyzanaqta alqaptaryna synaq júrgizdik. Nátıje ártúrli. Bıologııalyq qorǵaý ádisterin qoldaný arqyly pestıtsıdterdi 70%-ǵa deıin azaıtýǵa bolatynyn atap ótkim keledi», - dedi Saltanat Baeshova.
Sarapshy eskirgen jáne jaramsyz pestıtsıdter Qazaqstan aýyl sharýashylyǵyndaǵy ózekti máselelerdiń biri ekenin atap ótti.
«Búgingi konferentsııanyń mańyzy zor. Sebebi, bul máseleni sheshýimiz kerek. Topyraqtyń lastanýy aýyl sharýashylyq ónimderine, et pen sútke túsedi», - dedi ol.
FAO pestıtsıdterdi basqarý jónindegi aǵa tehnıkalyq keńesshisi Stefan Robınsonnyń sózinshe, eskirgen pestıtsıdtterdi joıý óte qıyn.
«Árıne, mıllıondaǵan gektar jerdi tazartý sonshalyqty ońaı sharýa emes. Sonymen qatar, mundaı pestıtsıdterdi jaǵý óte qymbat ádis. Sondyqtan búgingi konferentsııada biz álemde bar jáne aldaǵy 10-15 jylda qazaqstandyq fermerler qoldana alatyn balama qoljetimdi ádisterdi talqylap jatyrmyz», - dedi Stefan Robınson.
Buǵan deıin elimizde paıdalaný merzimi ótken 6 myń tonna pestıtsıd baryn jazǵan edik.
Eske salaıyq, Memleket basshysy Qasym-Jomart Toqaev 2024 jyldyń qańtarynda Rımde FAO bas dırektory Tsıý Dongıýmen kezdesýinde Qazaqstanda Ortalyq Azııa úshin FAO-nyń sýbóńirlik keńsesin qurýdy usynǵan bolatyn.
