El astanasy Orynbordan Qyzylordaǵa kóshkende jetken tarıhı ústel mektep mýzeıinde tur

QYZYLORDA. KAZINFORM – Osydan týra júz jyl buryn el astanasy Orynbordan Qyzylordaǵa kóshkende jetken ústel qaladaǵy mektepterdiń birinde saqtaýly tur.

«Ulaǵat» jeke mektebiniń quryltaıshysy, qarjyger Qalqazbek Ájibekov tarıhı jádigerdi kóp jyldan beri kóziniń qarashyǵyndaı saqtap keledi. Ony qarjy basqarmasyn basqaryp turǵanda sondaǵy mýzeı qoryn tolyqtyrý barysynda tapqan. 

– 1988 jyly Ulttyq bankke barǵanmyn. Sol kezde sharýashylyq jónindegi bólim bastyǵy Erbaı Shaǵdarovtyń kabınetindegi úlken oıýly ústelge kózim túskeni bar. Keıin mýzeı ashylǵanda sony izdedim. Erekeńe barsam, aldynda jańa ústel. Burynǵysyn jaramsyz dep saraıǵa shyǵaryp tastaǵan eken. Shań basyp turǵan jerinen mýzeıge ákep qoıdym, – dedi Qalqazbek Ájibekov. 

Arada biraz jyl ótkesin mýzeı jabylyp, jádigerdi qaıtadan qoımaǵa shyǵarýǵa týra keledi. Beride ǵana bilim ordasynyń tórinen oǵan oryn tabyldy. Mektep quryltaıshysy syry ketip, toza bastaǵan múlikti ustaǵa qashatyp, jóndetip aldy. Aıtpaqshy, bul ústeldi eń birinshi Qazaq AKSR Memlekettik bank basshysy paıdalanǵan. 

Eske salaıyq, bıyl – Qyzylorda qalasynyń Qazaq AKSR-iniń astanasy atanǵanyna 100 jyl.