«El arnanyń»merekelik efırinde «Qazaq arýy» sulýlyq baıqaýynyń telenusqasy kórsetiledi
ASTANA. 18 naýryz. QazAqparat - Almaty qalasynda erekshe baıqaý -«Qazaq arýy» sulýlyq saıysy ótti. Syrtqy sulýlyqty ǵana baǵalamaý - baıqaýdyń basty ereksheligi. Qatysýshylarǵa qoıylǵan basty talap: qazaq tilinde erkin sóıleý, ulttyq dástúr men el tarıhyn, ádebıetin jetik bilý. «Qazaq arýy» sulýlyq baıqaýynyń jeńimpazy ataǵyna 20 jasar qyzylordalyq Áıgerim Qanatbaeva qol jetkizdi. Baıqaýdyń telenusqasy 22 naýryz kúni saǵat 20.00-de «El arna» telearnasynan kórsetiledi.
Baıqaý uıymdastyrýshysy - prodıýser Baıan Esentaeva. Onyń aıtýynsha, baıqaýdyń maqsaty sulý qyzdy anyqtaý emes, qazaq qyzy atyna laıyq arýlardy elge tanystyrý. Arýlarǵa qoıylǵan basty talaptar: qazaq tilinde erkin sóıleý, ulttyq dástúr men el tarıhy jáne ádebıetin jetik bilý, boıy 170 sm kem bolmaý men shashynyń uzyn bolýy.
Osy jyly Qazaqstannyń barlyq qalalarynan kelgen 500 úmitkerden 18 boıjetken tańdap alyndy. Eń jas qatysýshynyń jasy 16-da.
Uıymdastyrýshylar: «Qazaqstanda baıqaý tanymaldyǵy arta túsip, jańa dárejege kóterilý ústinde» - deıdi. Reseıde turatyn qazaqtar da bul baıqaýǵa qyzyǵýshylyq tanytyp, keler jyly Reseılik arýlaryn jibermek eken. Qatysýshylardyń qazaq estrada juldyzdarymen birlesip óner kórsetýi dástúrge aınaldy. Olardyń ishinde - Aıgúl Imanbaeva, Aıqyn, Álı Oqapov, Álisher Karımov, Ánel Arynova jáne t.b. Baıqaýdyń mindetti «taǵamy» - shyǵarmashylyq saıys. KeshYou tobynyń sulý qyzdary, Marat Oralǵazın men Marat Álibaev, Álı Oqapov pen Aısáýle Baqytbek baıqaý júrgizýshileri boldy.
Arýlarymyz KeshYou toby oryndaıtyn «Qazaq qyzdary» ánine qoıylǵan yrǵaqty bı bılep bastady. Keıinnen bı áýezdi dástúrli «Aqqýmen» áýenimen jalǵasty. Odan ózge, qazaqstandyq dızaınerler keshki kóılekteriniń dıfılesin usyndy. Qatysýshylar Aıda KaýmeNOVA, Aıgúl Qasymova, Lariya jáne jańadan qadam jasap kele jatqan jas dızaıner Náılá Baıkýchýkovanyń kıimderin qalyń jurtshylyqtyń nazyryna saldy.
Qorytyndy saıys «Suraq-jaýap» dep ataldy. Munda sulýlarymyz arnaıy daıyndalǵan suraqtarǵa jaýap berip, qazaq mádenıeti men salt-dástúri jaıly bilimderin dáleldedi.
«Qazaq arýy» baıqaýynyń jeńimpazy brıllıant tastarmen kómkerilgen keremet alqanyń ıegeri atandy. «Qazaqtyń qyzy» ataǵyna laıyq eń sulý boıjetkendi anyqtaýdy Qazaqstan Respýblıkasy Prezıdentiniń keńesshisi, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova bastaǵan qazylar qaýymyna tapsyryldy. Ádil-qazy músheleri - M.Áýezov atyndaǵy qazaq drama teatrynyń dırektory Esmuhan Obaev, Sh.Aımanov atyndaǵy «Qazaqfılm» AQ dırektory Ermek Amanshaev, QR eńbek sińirgen maıtalmany, QazUÓA rektory Arystanbek Muhamedıuly, «El Arna» arnasynyń dırektory Aıgúl Múkeı, dızaıner jáne feshn-sarapshy Sáken Jaqsybaev, QR eńbek sińirgen aktrısasy, eks-Mıss Qazaqstan Sáýle Rahmetova, tanymal ánshi Sáken Maıǵazıev pen «Qazaq arýynyń» prodıýseri Baıan Esentaeva.
«Qazaq arýy» syndy telejobany kórermenderge usyna alatynymyzǵa óte qýanyshtymyz. Bul jobanyń mazmuny men talǵamy dál bizdiń mentalıtetimizge laıyqtalǵan. Osylaısha biz ózimizge tán, qazaq eline tán ereksheligimizdi kórsetkimiz keledi. Barlyq sulýlyq baıqaýlary televıdenıemen tyǵyz baılanysty ekeni anyq. Bul reıtıngisi kóp sharalardyń biri. Biz tek syrtqy kelbetke emes, shyǵarmashylyq múmkinshilikke basa nazar aýdaratynymyzdyń dáleli -«Qazaq arýy» jobasy.
Baıqaýǵa daıyndyq - qatysýshylardyń ómirindegi úlken sabaq. Al jeńimpaz arýmyz birneshe sala boıynsha qyzmetin jetildirýge múmkindik alady - televıdenıe, óner, sán, shoý-bıznes, kıno. Bul - óz mádenıeti men tarıhyn baǵalap, qurmetteıtin shyǵys qyzynyń jańa ómirine beriletin úlken joldamasy. Úzdikti anyqtaý barshanyń mindeti!», - deıdi «El arna» arnasynyń dırektory Aıgúl Múkeı.
