«El arnada» tuńǵysh qazaqstandyq jastar telenovellasy kórsetile bastaıdy
ALMATY. 20 jeltoqsan. QazAqparat /Erbol Azanbek/ - Búgin keshkisin "El arna" telearnasynda "Ásel, dostary men qurbylary" atty qazaqstandyq alǵashqy jastar telenovellasynyń kórsetilimi bastalady.
Serıal Qazaqstan jastarynyń problemalary, adamı qarym-qatynastaryn qalyptastyrý, jumys pen sabaqty birge alyp júrý, jastyq armandar men qııaldar, úmitter men mahabbat týraly. Serıaldyń basty keıipkerleri -ýnıversıtettiń ekinshi kýrsynda oqıtyn, jataqhanada turatyn stýdent Ásel men onyń dostary.
Qazaqstandyq televıdenıege jańa eýropalyq format alyp kelgen serıaldy kıno álemindegi tanymal Qarpyqovtar bastaǵan top jasaýda. Abaı Qarpyqov serıaldyń bas prodıýseri bolsa, uly Álmırı Qarpyqov jobanyń kreatıvti dırektory. Qoıýshy- operatory Alekseı Berkovıch, qoıýshy-sýretshisi Ómirzaq Shmanov. Rejısserlary - Galına Efımova men Shyńǵys Qapın. Bas redaktory - Záýresh Erǵalıeva. Serıaldyń stsenarııin toǵyz avtor jazǵan. Olardyń ishinde "Qara shegirtke", "Toǵysqan taǵdyrlar" serıaldarynan tanymal Albına Ahmetova, Aleksandr Kan, Oksana Bondarenkolar bar.
Serıal keıipkerleri 1,5 myń adamnyń ishinen kastıng arqyly tańdalyp alynypty. Túsirilimderde Arýjan Jazylbekova, Talǵat Farrýk, Samat Mamıev, Fırýza Gareeva, Aısulý Ázimbaeva, Rınat Maltsagov syndy jas akterler óner kórsetedi.
"Serıaldyń formaty erekshe. Bir jaǵynan komedııa, bir jaǵynan keıipkerler jastar arasyndaǵy óte mańyzdy problemalardy qozǵaıdy. Meniń oıymsha, osyǵan oraı serıaldy tabysty taǵdyr kútip tur",- deıdi serıaldyń bas prodıýseri Abaı Qarpyqov. Onyń aıtýynsha, serıaldyń birinshi kezeńi 80 epızodtan turady. Jalpy alǵanda 24 mınýttyq 14 serııa túsirilmek.
