«El arnada» taǵy da jańa joba - «Synaq»!
ASTANA. 31 qazan. QazAqparat - Elimizdegi eń tartymdy telearnalardyń biri «El arna» jaqyn kúnderi birneshe jańa jobanyń tusaýyn keskeli otyr. Olardyń qatarynda Ahat Ybraevtyń «Jaqsy adam» atty portrettik habary, «Týǵan ólke» jobasynyń úshinshi maýsymy, búgingi áıelderdi mazalaıtyn suraqtarǵa jaýap izdep, áıel janynyń ıirimderine úńiletin «Áıeldiń bári ádemi» jobasy men «Synaq» dep atalatyn jańa baǵdarlama bar.
8 qarasha kúni tusaýy kesiletin «Synaq» baǵdarlamasynyń alǵashqy túsirilimi ótti. Qansha jerden qaısar bolsańyz da, bul jobanyń talaptaryn oryndaý úshin júrek jutqan erlik pen ómirlik tájirıbede shyńdalǵan erik-jiger qajet. Bul - elimizge belgili azamattardy bastalmaı jatyp ábigerge salǵan tyń joba. Birer ánshilerimiz «Synaqtyń» talaptarynan birden bas tartsa, keıbiri aldymen kelisip alyp, keıinirek aınyp qalyp jatty.
Baǵdarlamanyń shaqyrýyna júreginiń túgi bar shoý-bıznes ókilderi ǵana kelisti. Olardyń qatarynda Jeńis Ysqaqova, Aqbota Kerimbekova, Álı Oqapov, Maqpal Isabekova, Nurlan Espanov sııaqty ánshiler, gıtarashy, «Bastaý» tobynyń múshesi Bolat Joldasov, telejúrgizýshiler Asha Mataı jáne Igor Sahar, «Jigitter» kvartetiniń ánshisi Aıdar Baıjanov, «Nysana» teatrynyń akteri Dáneker Orazbaı, «KZ» tobynyń ánshisi Beıbit Qushqalıev, aktrısa Darıǵa Badyqova, «Mysterions» tobynyń ánshisi Arman Qońyrbaev bar. Sahnalastaryn synaqtan ótkizetin baǵdarlama júrgizýshisi - Dastan Orazbekov. Bas júlde - eki adamǵa shetelge saıahat! Bul týraly «El arnadan» habarlady.
