«El arnada» - «Ázil kesh»
ASTANA. 18 qarasha. QazAqparat - 22 qarashadan bastap «El arnada» «Ázil kesh» baǵdarlamasy jańa maýsymyn bastaıdy. Buryn tanymal syqaqshy Ýálıbek Ábdiraıymov tizginin ustaǵan bul baǵdarlama jańa formatta, jańa júrgizýshilerimen efırge shyǵady. Budan bylaı keshińizdi ázilmen árleıtinder - satırık Beıbit Sarybaı men akter Nurbol Aıtýov.
Qojanasyrdan qalǵan qaljyń men Aldardan qalǵan ázildi usynatyn baǵdarlamada «Tamasha», "Shanshar", "Aldaraspan", "Kúlki kerýeni", "Baýyrjan shoý" sııaqty ázil-syqaq teatrlarynyń qoıylymdary jáne avtorlary men oryndaýshylarynyń ómiri jaıly áserli áńgime usynylady. Ótken kúnniń ázili men búgingi kúnniń áziliniń arasyndaǵy «boıy jetse de, oıy jetpeıtin» tustary talqyǵa túsedi.
Bul jobanyń jańalyǵy - ázil-syqaq teatrlary ázirlep ákelgen qoıylymdar «Ázil keshtiń» stýdııasynda oryndalady. «Ázil kesh» kórermenke kúlki syılaıtyn baǵdarlama ǵana emes, munda satıra saıypqyrandarynyń salıqaly áńgimesi de bolady. Sondaı-aq sheber ázildeı biletin ártister stýdııanyń talaptaryn oryndaıdy: mysaly, tanymal akterlerdiń mátindi jyldam oqý júıriktigi tekserilýi múmkin. Qysqasy, ázil-syqaq teatrlarynyń akterleri «qara terge» túsedi. Ol az deseńiz, munda belgili ánshilerdi basqa qyrynan kórip, tanymal ánderge parodııa usynylady.
«Jalpy, júzden asa arnany kórip otyrǵan búgingi kórermendi kúldirý ońaı emes. Qazir talǵam ózgerdi, talap basqa. Sonymen birge reseılik, sheteldik emes, qazaqy ázilge shóldep otyrǵanymyz ras. Osy turǵydan alǵanda biz bárimizge tanys, asa bir ótimdi bolǵan eski ázilder men sııasy keppegen jańa qoıylymdardyń arasyndaǵy tepe-teńdikti ustaǵymyz keledi. Al shaqyrylǵan qonaǵymyzdyń ımprovızatsııalyq qasıeti men oı-qııalynyń júıriktin synaý úshin keıipker beınesinde suhbat berýin, taǵy da basqa qyzyqty tapsyrmalar oryndaýyn talap etemiz. Baǵdarlama avtorlary kórermenniń kóńilinen shyǵýdan úmitti», - deıdi «El arna» telearnasynyń bas redaktory Ásııa Baǵdáýletqyzy.
Jaqsylary jymıtyp, kórkemderi kúldiretin baǵdarlamany 14 jasqa tolǵan kórermenderdiń ata-analarymen birge otyryp, 44 jasqa tolǵan kórermenderdiń balalarymen birge otyryp, 64 jasqa tolǵan kórermenderdiń nemerelerimen birge otyryp kórýine bolady, dep habarlady «El arnadan».
