«EL ARNA» jyldyń úzdik teleserıalyn marapattady

NUR-SULTAN. QazAqparat - Qazaqstannyń tuńǵysh kınoarnasy «EL ARNA» «Eń úzdik teleserıal» júldesiniń jeńimpazyn marapattady, dep habarlaıdy QazAqparat tilshisi.

«EL ARNA bıyl birinshi ret «Habar» agentigi túsirgen serıaldar arasynda «Eń úzdik teleserıal» júldesin jarııalady. 2018 jyly agenttik 10 telehıkaıa túsirdi, sonyń arasyndaǵy eń úzdigin tańdap aldyq. Nátıjesinde, «Qarlyǵash uıa salǵanda» telehıkaıasy úzdik atandy», - dedi Arman Baltabaıuly Qazmedıa ortalyǵynda «Habar» agenttiginiń jańa maýsymynyń ashylýynda.

Músinsheni jobanyń avtory, ári prodıýseri Gúlnur Mamasarıpova jáne basty keıipkerdi somdaǵan Kámshat Joldybaeva aldy.

«Búgin birinshi ret júlde alyp turmyn. Bul - óte jaqsy bastama. Sebebi serıaldy ómirge ákelý úshin tutas shyǵarmashylyq top janyn salyp jumys isteıdi. Eńbegimizdiń kishigirim bolsa da, atalyp ótkeni mártebe. «Qarlyǵash uıa salǵanda» nege kópshiliktiń kóńilinen shyqty? Meniń oıymsha, munda stsenarııdi de tamasha jazýǵa bolady, myqty rejısser men operatordy da alýǵa bolady. Biraq, jansyz akter alsań, eshteńe shyqpaıdy. Serıaldyń qupııasy basty keıipkerlerdiń júreginde dep oılaımyn. Sondyqtan, «Tasqyn» men «Qarlyǵashqa» rahmet aıtamyn», - dedi Gúlnur Mamasarıpova.

Aıta keteıik, «Habar» telearnasynda «Qarlyǵash uıa salǵanda» telehıkaıasynyń ekinshi maýsymy kórsetilip jatyr.

Búgin astanada atalmysh arnanyń jańa telemaýsymy tanystyryldy. Agenttik quramynda respýblıkalyq «Habar» men «Habar 24», «Kazakh TV» jáne «EL ARNA» telearnalary bar.