«El arna» «Evrovıdenıe-2012» án baıqaýyn tikeleı efırden kórsetedi

Mádenı sharany elimizde tek «El arna» telearnasy ǵana tikeleı efır arqyly kórermen nazaryna usynatyn bolady. Al baıqaýǵa tanymal mýzyka sarapshysy Nurbergen Mahambetov pen radıo habarlaryn júrgizýshi Qaldybek Jaısańbaı óz pikirlerin bildirip otyrady.

Aǵymdaǵy jyly «Óz otyńdy jaq!» uranymen ótetin baıqaýdyń aqtyq máresinde 26 eldiń ókili óz baqtaryn synaıtyn bolady. 1956 jyldan bastap búkil Eýropanyń basty án baıqaýyna aınalǵan osy mádenı sharany «El arna» birneshe jyldan beri tikeleı efırden kórsetip keledi. «Biz ózimizdiń kórermenderimizge jarqyn mýzykalyq shoýdy usynatyndyǵymyzǵa qýanyshtymyz. «Evrovıdenıe» joǵary mártebesin joǵaltar emes ári jyl saıyn ony uıymdastyrýshylar sahnalyq tańǵalarlyq kórinisterimen, oryndaýshylarymen jáne mýzykany  qoıýdaǵy jańashyldyqtarymen barsha kórermenderdi tánti etýge tyrysady», - deıdi atalǵan telearnanyń dırektory Aıgúl Múkeı.

Aıta keteıik, aǵymdaǵy jyly baıqaý telefızııalyq efır turǵysynan alyp qaraǵanda erekshe shoý bolady dep kútilýde. Zalda HD sapasynda túsiretin 25 kamera ornatylyp, ekrannan árbir detal kórinetin bolady. Sondaı-aq búkil zalda qozǵalatyn 2 Spidercam kamerasy, relstegi 2 kamera, 2 túsirilim krany jumys isteıdi. Qajetti jabdyqtar júk kólikterimen 90 konteınerde jáne 2 júk ushaǵymen Germanııadan jetkizilgen. Sahna men arena 3D formatynda jasalǵan.

«El arna» telearnasynda «Evrovıdenıe - 2012» baıqaýyn kórsetý kestesi:

1-shi kúngi jartylaı fınal - 22 mamyr, túngi 01,00

qaıtalanýy 1-shi kún - 23 mamyr, kúndizgi 12,00

2-shi kúngi jartylaı fınal - 24 mamyr, túngi 01,00

qaıtalanýy 2-shi kún - 25 mamyr, kúndizgi 12,00

konkýrs fınaly - 26 mamyr, túngi 01,00

qaıtalanýy - 27 mamyr, kúndizgi 12,00