El ardagerleri elordada jınaldy
ASTANA. KAZINFORM — Búgin elordada «Ardagerler uıymy» respýblıkalyq qoǵamdyq birlestigi ortalyq keńesiniń III plenýmy ótti.
Іs-sharaǵa «Ardagerler uıymy» ortalyq keńesiniń tóraǵasy Baqtyqoja Іzmuhambetov, Mádenıet jáne aqparat mınıstri Aıda Balaeva, Parlament Májilisiniń depýtattary, memleket jáne qoǵam qaıratkerleri qatysty.
Plenýmda eki másele qaraldy:
— 14 naýryzda Býrabaıda Memleket basshysy Qasym-Jomart Toqaevtyń tóraǵalyǵymen ótken Ulttyq quryltaıdyń ІV otyrysynda Prezıdent júktegen tapsyrmalar boıynsha uıym aldyndaǵy mindetter;
— Uly Jeńistiń 80 jyldyǵyna oraı «Ardagerler uıymy» respýblıkalyq qoǵamdyq birlestiktiń is-sharalar josparynyń oryndalý barysy.
— Búgin el damýy jolynda eseli eńbek etip, halqymyzdyń qazynasyna aınalǵan ózderińizdeı ardaqty aqsaqaldar qaýymymen júzdesip, pikir almasyp otyrǵanyma qýanyshtymyn. Búgingi pleným — Memleket basshysynyń Ulttyq quryltaıdyń tórtinshi otyrysynda júktegen mańyzdy tapsyrmalaryn júıeli iske asyrý jolynda ortaq mindetterdi naqtylap, birlesken jumystardy úılestirýge baǵyttalǵan asa mańyzdy basqosý, — dedi Mádenıet jáne aqparat mınıstri Aıda Balaeva plenýmda.
Osy oraıda mınıstr Býrabaı tórinde ótken Ulttyq quryltaıda birqatar mańyzdy másele talqylanǵanyn tilge tıek etti.
— Prezıdent tarapynan elimizdiń saıası jáne áleýmettik damýyna yqpal etetin ózekti tapsyrmalar berilip, quryltaı músheleriniń mazmundy usynystary aıtyldy. Memleket basshysy aǵa býyn jas urpaqqa jol nusqap, baǵyt-baǵdar berýi kerektigin atap ótkeni belgili. Aǵa býyn — qoǵamnyń aqylshysy. Biz alda sizderdiń ómirlik tájirıbelerińizge, parasatty paıymdaryńyzǵa arqa súıeımiz, — deıdi vedomstvo basshysy.
Onyń aıtýynsha, ótken jyly mınıstrlik ardagerler uıymymen ózara yntymaqtastyq týraly memorandým jasap, arnaıy is-sharalar jospary bekitildi.
— Mınıstrliktiń qoldaýymen uıym usynǵan mazmundy jobalar negizinde 14 tomnan turatyn 4 kitap jaryq kóredi. Bul eńbekter — jas urpaqtyń boıyna otansúıgishtik pen ulttyq tárbıe dánin sebetin taǵylymdy týyndylar bolady dep senemiz. Prezıdent bastamalaryn tabysty júzege asyrý jolynda birlese jumys isteımiz degen úmittemin. Elimizdiń damýy men bolashaǵy tek ekonomıkalyq ǵana emes, rýhanı damý arqyly júzege asatyny anyq. Memleket basshysynyń baǵyt-baǵdarlary men reformalaryn júzege asyrýǵa atsalysý — barshaǵa ortaq mindet. Qoǵamda ásirese jastar arasynda, ulttyq birlikti nyǵaıtý jáne patrıottyq tárbıeni kúsheıtýde sizderdiń rólderińiz zor ekenin taǵy da erekshe atap ótkim keledi. Jıyn aıasynda usynys-pikirlerińizdi tyńdap, ózara talqyǵa salýǵa daıynbyz, — dep tolyqtyrdy Aıda Balaeva.
Sondaı-aq vedomstvo basshysy bıylǵy Ulttyq quryltaıda Prezıdent memlekettik organdarǵa 54 tapsyrma júktegenin aıtty.
Odan bólek, jıyn barysynda elimizdiń ishki saıasat tujyrymdamasy ázirlenetini belgili boldy.
Aıta ketsek, Uly Jeńistiń 80 jyldyǵyna oraı el aýmaǵynda eki myńdaı is-shara ótedi.