«El amanaty» jalpyulttyq saýalnamasy aıaqtaldy

NUR-SULTAN. QazAqparat - «Aýyl» halyqtyq-demokratııalyq partııasy «El Amanaty» jalpyulttyq saýalnamasyna ótinimderdi jınaýdy aıaqtady. Bul týraly QazAqparat partııanyń baspasóz qyzmetine silteme jasap habarlaıdy.

Jobanyń basty maqsaty - azamattardy tolǵandyratyn asa ótkir áleýmettik-ekonomıkalyq, qoǵamdyq mańyzy bar problemalardy anyqtaý. Saýalnama onlaın jáne oflaın formattarda júrgizildi. Partııa músheleri júzdegen aýyldy aralady. Sonymen qatar, saýalnama uıymdastyrýǵa búkil el boıynsha 700-den astam eriktiler kómek kórsetti.

Partııanyń Saıası keńesiniń sheshimi boıynsha saýalnama paraǵyna barlyǵy 14 taqyryp engizildi jáne respondentter óz amanattaryn qaldyra aldy. Aldaǵy ýaqytta partııa basshylyǵy jalpyulttyq saýalnama nátıjeleri týraly habardar etedi.

«El Amanaty» - «Aýyl» halyqtyq-demokratııalyq patrıottyq partııasy ótkizgen alǵashqy jalpyulttyq saýalnamasy.

«Aýyl» partııasy Saıası keńesiniń sheshimi boıynsha «El Amanaty» jalpyulttyq saýalnamasyna engizilgen máselelerdiń tizbesi:

- Memlekettik bıýdjet qarajatynyń tıimsiz baǵdarlamalarǵa mıllıardtap jumsalýyn toqtatyp, halyq múddesine baǵyttaý;

- Jańa áleýmettik saıasatty qalyptastyrý, ásirese járdemaqynyń ár balaǵa tólenýin qamtamasyz etý;

- Jerdiń shetel azamattaryna satylýyna jáne jalǵa berilýine tyıym salý;

- Jastarǵa bilimniń, jumys pen baspanany qol jetimdi etý;

- Turaqty jumys oryndaryn ashýdy yntalandyrý. Jumysshy eńbeginiń ádil baǵalanýy men múddesin qorǵaý;

- Jemqorlardyń jazasyn kúsheıtý arqyly korrýptsııanyń «tamyrynabaltashabý»;

- Halyq kóp tutynatyn taýar túrlerin óndirýshilerdi qoldaý arqyly ımport úlesin azaıtý;

- Shalǵaıdaǵy jáne memleket shekarasyna jaqyn ornalasqan eldi-mekenderde turyp jatqan azamattarǵa memlekettik qoldaý kórsetý;

- Jol qurylysy jáne áleýmettik mańyzdy obektilerdi qabyldap alý barysynda qoǵamdyq baqylaýdy kúsheıtý;

- Aýyldyq eldimekenderdiń barlyǵyn, sonyń ishinde shalǵaıdaǵy aýyldardy ınternetpen qamtý;

- Sheteldegi qandastarǵa Qazaqstan Respýblıkasynyń azamattyǵyn alýdy jeńildetý;

- Sport pen mádenıet salalarynda «tanys-tamyrlyqty» joıý. Ásirese halyqaralyq deńgeıde el namysyn qorǵaıtyn azamattardyń ádil iriktelýin qamtamasyz etý;

- Aýyldardaǵy ońtaılandyrý kezeńinde jabylyp qalǵan medıtsınalyq mekemelerdi qaıta ashý;

- Ónim óndiretin shaǵyn jáne orta bıznes ókilderi men fermerlerdi nesıelendirýdiń paıyzdyq mólsherlemesin 2-4%-ǵa deıin tómendetý jáne komýnaldyq shyǵyndaryn sýbsıdııalaý.