«Ekijúzdi adam dep aıtqanym ras»: Aqtóbede memlekettik qyzmetshi jazaǵa tartyldy
AQTÓBE. KAZINFORM – Agroónerkásiptik keshendegi memlekettik ınspektsııa komıtetiniń Aqtóbe qalalyq aýmaqtyq ınspektsııasynyń basshysy Erlan Ibrashev áriptesimen sózge kelip, is Ádep jónindegi keńeste qaraldy. Keńes músheleri sógis túrindegi jaza taǵaıyndaýǵa uıǵarym berdi.
Ádep jónindegi keńeste Aqtóbe qalalyq aýmaqtyń ınspektsııasynyń basshysy Erlan Ibrashevtiń isi qaraldy. Memlekettik qyzmet istergi agenttiginiń Aqtóbe oblysy boıynsha departamenti basqarmasynyń bas mamany Danııar Mahambetovtyń aıtýynsha, ınspektsııa basshysy otyrǵan kabınetke bas maman A.Seıtmýhambetova ruqsatsyz kirgen ári amandaspaǵan. Sol kezde ekeýi sóz talastyryp, Ádep jónindegi ýákil jınalysy ótedi.
– Jınalys barysynda A.Seıtmýhambetova ınspektsııa basshysy E. Ibrashevten keshirim surady. Alaıda E.Ibrashev keshirim qabyldamaıtynyn bildirgen soń A.Seıtmýhambetova «endi seniń aıaǵyńdy súıeıin be» dep aıtty. Osy jaǵdaıdan keıin E.Ibrashev ashýǵa erik berip, «eı, sen, ne ekijúzdenip otyrsyń, aferıstenbe» degen sózderdi aıtyp, jıyn aıaqtalmastan zaldan shyǵyp ketti, - dedi Danııar Mahambetov.
Ádep jónindegi keńes otyrsynda Erlan Ibrashev birneshe kún boıy qan qysymy kóterilgen soń sózge kelgenin aıtty.
– Ekijúzdi adam dep aıtqanym ras. «Sen aferısiń» dep qolymdy sozyp, áı dep aıtpadym, onyń bári jalǵan. «Aferıst adamnyń isin istep tursyń» dedim. Birinshi jylap keshirip surady, keıin mazaq qylyp, kúlip «seniń aıaǵyńdy súıem ba, aıaǵyńa jylyǵam ba» dedi. «Memlekettik qyzmetker aferıst adamnyń isin istep tursyń» dedim, - dedi Erlan Ibrashev.
Ádep jónindegi keńes memlekettik qyzmetshige sógis túrindegi tártiptik jaza taǵaıyndaý týraly uıǵarym shyǵardy. Keńes músheleri basshy ujymdaǵy aýyzbirshilikti saqtaý almaǵany úshin jazalandy.
Aıta keteıik, Shalqar aýdandyq sáýlet, qurylys jáne qala qurylysy bóliminiń basshysy eki merdigerden mıllıondap para alǵany úshin aıyptalyp jatyr. Biri sý jelilerin qaıta jańǵyrtý, ekinshisi turǵyn úıge ınjenerlik ınfraqurylym tartý jobalarynyń merdigeri.