EQYU sarapshysy aqparat jáne kommýnıkatsııalar týraly zań jobasyna baǵa berdi

ASTANA. QazAqparat - «Qazaqstan Respýblıkasynyń keıbir zańnamalyq aktilerine aqparat jáne kommýnıkatsııalar máseleleri boıynsha ózgerister men tolyqtyrýlar engizý týraly» zań jobasynda ońtaıly úrdister barshylyq. Bundaı pikirdi atalǵan zań jobasy boıynsha Májiliste ótken sarapshylar kezdesýinde EQYU sarapshysy Dmıtrıı Golovanov málim etti, dep habarlaıdy QazAqparat.

«Zań jobasynda jaǵymdy úrdister barshylyq, ıaǵnı bul turǵyda qazaqstandyq tájirıbeni nazarǵa alatyn tustary az emes. Birinshiden, ony iske asyrýda tujyrymdamalyq ári tehnıkalyq turǵyda zań jobasy aıtarlyqtaı halyqaralyq standarttar men talaptarǵa sáıkes keledi. Jalpy alǵanda, bul qujatty qabyldaý BAQ-tyń jaǵdaıynyń nasharlaýyna alyp kelmeıdi dep oılaımyn», - deıdi sarapshy.

Sonymen qatar ol zań jobasy buqaralyq aqparat salasyna qatysty quqyqtyq retteýdiń irgetasyn keńeıtip otyrǵanyn, bul óz kezeginde ońtaıly qadamdardyń biri bolyp tabylatyndyǵyn sóz etti.

Dmıtrıı Golovanovtyń sózine qaraǵanda, BAQ jumysynda ákimshilik kedergilerdi joıýǵa qatysty jaǵymdy sheshimder qamtylǵan.

«Qujatta sonymen qatar aqparatqa qol jetkizýde jaqsy múmkindikter qarastyrlǵan. Bul turǵyda buqaralyq aqparat quraldarymen jumys isteýi tıis laýazymdy tulǵalardyń qyzmetin retteıtin tártiptiń engizilýi pozıtıvtik bolyp tabylady. BAQ-pen osy salany túsinetin adam jumys isteýi kerek. Bir jaǵynan alyp qaraǵanda ol memlekettik qyzmetshi bolǵanymen, ekinshi jaǵynan olar salanyń qyzmetin túsinetin adamdar», - dep toqtaldy EQYU sarapshysy.

Budan buryn habarlanǵandaı, sarapshylar kezdesýinde QR Aqparat jáne kommýnıkatsııalar vıtse-mınıstri Alan Ájibaev zań jobasyn talqylaý kezinde usynystardyń basym bóligi eskerilgenin atap ótti.