EQYU Sammıtine keletin Memleket basshylary men olarǵa erip júretin delegatsııalar kedendik baqylaýdan ótpeıdi
ANA. 5 qarasha. QazAqparat /Gúlmıra Álıakparova/ - EQYU sammıtine keletin Memleket basshylary men olarǵa erip júretin delegatsııalar Astana áýejaıynda kedendik baqylaýdan ótpeıdi. Olar ushyp-qoný alańynan Sammıt ótetin orynǵa tikeleı kortejben jetkiziletin bolady. Bul týraly búgin ótken baspasóz máslıhatynda «Astana halyqaralyq áýejaıy» AQ birinshi vıtse-prezıdenti Esbol Kereı málim etti.
Áýejaı basshylyǵynyń paıymdaýynsha, bul qaýipsizdik erejelerine qaıshy kelmeıdi. «Memleketter basshylarynan basqa sheteldik delegatsııalarǵa tekseristi tek qaıta ushardyń aldynda júrgizetin bolamyz», - deıdi ol.
1 jeltoqsan kúni tańsáride arasyna bes mınýt salyp Astananyń áýejaıyna birinen keıin biri 70 ushaq qonatyn bolady. Ushaqtar bas qalamyzdyń áýe keńistiginde uzaq qalyqtap qalmas úshin, kelip qonǵan ushaqtarǵa neǵurlym jyldam qyzmet kórsetý úshin, Astana halyqaralyq áýejaıy qosymsha 113 arnaıy tehnıkany satyp alýda, taǵy 23-i Almaty, Qyzylorda, Aqtóbe, Kókshetaý áýejaılarynan jalǵa alynatyn bolady. Olardyń ishinde avtotraptar men ushaqtardy súıretýge arnalǵan tehnıkalar bar. «Keıin satyp alynǵan tehnıkalardyń qajetin ózimizde qaldyryp, qalǵanyn óńirlerge satatyn bolamyz», - dedi áýejaı ókili.
Sondaı-aq Astana aýa raıynyń ereksheligi eskerilip, ushyp-qoný alańdaryn muz ben qardan tazartyp turý úshin áýejaıdyń 15 tehnıkasy, sondaı-aq jasalǵan kelisimderge sáıkes QR Kólik jáne kommýnıkatsııa mınıstrligi Avtomobıl joldary komıteti men qalalyq qyzmetterdiń jınaýǵa arnalǵan tehnıkalar joǵary daıyndyq rejimine qoıylady.
Buǵan deıin habarlaǵanymyzdaı, Astana áýejaıynyń turaǵy 31 ushaqqa eseptelgen, keletin borttardyń sany eki esege kóp bolýy sebepti taǵy 22 ushaqqa arnalǵan qosymsha perron salyndy. 20 qarashaǵa qaraı áýe kemeleriniń ekıpajdaryn ornalastyrýǵa arnalǵan qonaq úıdiń qurylysy aıaqtalady. Al qaıta jóndeýden ótkizilgen VIP-zal, E.Kereıdiń sózine qaraǵanda, meımandardy qarsy alýǵa saqadaı daıyn.
