EQYU sammıtine qatysýshylardyń Qazaqstannyń jetistikteri týraly mol málimet alýyna jaǵdaı jasaý qajet - Q. Saýdabaev
yrkúıektiń 8-i. QazAqparat /Qanat Mámetqazyuly/ - EQYU sammıtine qatysýshylarǵa jemisti jumys isteý múmkindigin usynyp qana qoımaı, olardyń Qazaqstan týraly mol málimet alýyna jaǵdaı jasaý qajet.
Búgin, jeltoqsannyń 1-2-isinde Astanada ótetin EQYU sammıtine daıyndyq jónindegi jumys tobynyń kezekti otyrysy barysynda QR Memlekettik hatshysy - Syrtqy ister mınıstri Qanat Saýdabaev osylaı málim etti.
«Aǵymdaǵy jylǵy jeltoqsannyń 1-2-si aralyǵynda ótetin EQYU sammıti týraly habar taratyp, onyń barysyn kórsetý úshin elimizge jáne elordaǵa álemniń túkpir-túkpirinen 1 myń 500-ge tarta BAQ tilshileri keledi dep kútilip otyr. Bul kezeńde barlyq álemdik aqparat quraldarynyń negizgi nazary elordadaǵy alqaly jıynǵa aýatyny sózsiz. Sondyqtan da, biz sammıt sheńberinde qonaqtarǵa jemisti jumys isteý múmkindigin usynyp qana qoımaı, olardyń Qazaqstan týraly jáne qazaqstandyqtardyń ómiri týraly jaqyn tanysyp, óz elderine qaıtqanda barynsha mol málimet ala ketýlerine qajetti jaǵdaı jasaýǵa tıispiz. Elimizge kelgen qonaqtar Qazaqstannyń táýelsizdikten bergi jyldarynda qol jetkizgen áleýmettik-ekonomıkalyq, saıası máselelerdegi jetistikterin naqty kóre alýy kerek», dedi jıyndy ashyp sóz sóılegen EQYU is basyndaǵy tóraǵasy, QR Memlekettik hatshysy-Syrtqy ister mınıstri Qanat Saýdabaev.
Sonymen birge, Memlekettik hatshy sharaǵa daıyndyq boıynsha aýqymdy jumystar atqarylyp jatqanyn, degenmen de pysyqtaı túsýi kútiletin sharalardyń da barshylyq ekendigin atap ótti.
