EQYU Sammıtine arnalǵan marka qoldanysqa engizildi
ASTANA. 23 qarasha. QazAqparat /Qanat Mámetqazyuly/ - Búgin Astanada 1-2 jeltoqsanda ótetin EQYU Sammıtine arnalǵan úsh kórkemsýretti markadan turatyn pochtalyq bloktar aınalysqa endi.
Osyǵan oraı, Syrtqy ister mınıstrliginde vedomstvonyń Halyqaralyq aqparat komıtetiniń tóraǵasy Roman Vasılenko men «Qazposhta» AQ-nyń basqarýshy dırektory Andreı Vagnerdiń qatysýymen atalǵan markalardy qoldanysqa endirýdiń saltanatty sharasy bolyp, poshtalyq blokty arnaıy mórtabanmen basý rásimi ótti.
«EQYU sammıtine arnalǵan markany arnaıy qoldanysqa engizý - bul poshtalyq jóneltilimdi qarapaıym belgileý ısharaty emes. Atalǵan biregeı úderistiń aýqymdy tarıhı qundylyǵy da barshylyq. Bizdiń elimiz úshin úlken saıası mánge ıe bul jaǵdaı tarıhtar qoınaýynda máńgige este qalatyn oqıǵa bolyp otyr. Sondyqtan da, arnaıy poshtalyq mórtabanmen qoldanysqa engizilgen marka álem elderiniń fılatelısteriniń kollektsııasynda qurmetti orynǵa laıyq», dedi saltanatty shara barysynda «Qazposhta» AQ-nyń basqarýshy dırektory Andreı Vagner.
Nomınaly 190, 140, 32 teńge markalardyń kólemi 28 jáne 40 mm, ol ofsettik ádispen tórt boıaýmen basylǵan. Markalardyń taralymy - 90 myń dana. Úsh kórkemsýretti markadan turatyn poshtalyq blokta Qazaqstan Týy aıasynda Prezıdenttiń Aqorda rezıdentsııasy, Táýelsizdik saraıy, Beıbitshilik pen kelisim saraıy, «Qazaq eli» monýmenti beınelengen. Jańa poshtalyq markalardy «Belarýs baspasóz úıi» baspasy shyǵarǵan, olardy poshta jóneltýge kez kelgen adam paıdalana alady.
