EQYU sammıti men VII Qysqy Azııa oıyndary qarsańynda «Astana» halyqaralyq áýejaıynda oqý-jattyǵýlar ótti
ASTANA. Qazannyń 7-i. QazAqparat /Gúlmıra Álıakparova/ - EQYU sammıti men VII Qysqy Azııa oıyndary qarsańynda áýe tasymaldaý qurylymdarynyń ártúrli tótenshe jaǵdaılarǵa daıyndyq kúıin tekserý maqsatynda keshe, qazannyń 6-sy kúni «Astana» halyqaralyq áýejaıynda oqý-jattyǵýlar ótti. Shara sanıtarlyq epıdemıologııalyq, kóliktegi jelilik ishki ister bólimi men tótenshe jaǵdaılar qyzmetteriniń qatysýymen ótti.
Oqý-jattyǵý «Belgisiz etıologııadaǵy aýrý shyqqan kezde shuǵyl saqtandyrý, epıdemııaǵa qarsy sharalardy uıymdastyrý jáne júrgizý» taqyrybymen ótti. Onyń stsenarıi boıynsha «Ystambul - Astana» baǵytymen ushyp kele jatqan ushaqtyń komandırinen Astana áýejaıynyń dıspetcherlik qyzmetine bortta dene qyzýy kóterilip, qatty aýyryp kele jatqan adamnyń bary týraly aqparat kelip túsedi. Ekıpaj músheleri men jolaýshylardyń jalpy sany 94 adam ekeni aıtylady. Dıspetcher qyzmetkeri habardy alysymen tıisti organdarǵa habarlap, olar ushaqty jedel tosyp alyp, tıisti saqtandyrý, tekserý jumystaryn júrgizedi.
«Álemde juqpaly aýrýlar jaǵdaıy turaqsyz birqatar óńirler bar. Bizde búkil álemdegi epıdemıologııalyq jaǵdaıdy baqylap otyratyn ǵylymı-praktıkalyq ortalyq bar. Oqý-jattyǵýǵa barlyq qurylymdardyń áreket etýin qajet etetin aýrý túrin aldyq. Respýblıka astanasynda jeltoqsan, qańtar jáne aqpan aılarynda ótetin birqatar iri sharalarǵa daıyndyq aıasynda mundaı birneshe jattyǵýdy ótkizýdi kózdep otyrmyz. Birinshi jattyǵý elordanyń basty áýe qaqpasy - áýejaıda ótti», - dedi QR Densaýlyq saqtaý mınıstrligi Sanıtarlyq epıdemıologııalyq qadaǵalaý komıteti tóraǵasynyń orynbasary Nurqan Sádýaqasov.
N.Sádýaqasovtyń aıtýynsha, áýejaı men densaýlyq saqtaý salasynyń qyzmetteri ózderiniń ártúrli tótenshe jaǵdaılarǵa joǵarǵy daıyndyq kúıin buǵan deıin de kórsetken bolatyn. «Esterińizde bolsa, ótken jyly Ulybrıtanııadan «shoshqa tumaýy» dıagnozymen 17 stýdent kelgen bolatyn. Medıkter joǵary deńgeıde áreket etti. Ata-analarymen kórispesten barlyǵyn birden oqshaýlap, juqpaly aýrýhanaǵa jetkizdi. Bizde adam ólimimen aıaqtalǵan birde-bir oqıǵa bolǵan joq», - dedi.
Aıta keteıik, Astana halyqaralyq áýejaıyna kúndelikti barlyq óńirlerden halyqaralyq reıstermen 10 myńnan astam jolaýshy keledi. Onyń ishinde 3200 - birqatar asa qaýipti ınfektsııa túrleri boıynsha jaǵdaıy turaqsyz Ońtústik-shyǵys Azııa elderinen keledi.
