EQYU sammıti kúnderi Qazaqstannyń soltústiginde kún aıazdy bolady - aýa raıy boljamy
ASTANA. 27 qarasha. QazAqparat - Astanada EQYU sammıti ótetin 1-2 jeltoqsan kúnderi Qazaqstannyń soltústiginde kún aıazdy bolady, dep habarlaıdy TJM baspasóz qyzmeti «Qazgıdromet» respýblıkalyq memlekettik kásipornyna silteme jasaı otyryp.
«Aýa raıy boljamyna sáıkes, 27 qarasha men 3 jeltoqsan aralyǵynda, osy kezeńniń ekinshi jartysynda Qazaqstan aýmaǵynda aýanyń temperatýrasy tómendep, jaýyn-shashyn bolady, bul topyraqtyń dymqyl qor jınaýyna jaqsy jaǵdaı týǵyzady», - delingen búgin taratylǵan aqparatta.
Respýblıkanyń soltústik bóliginde osy kezeńde jaýyn-shashyn bolyp, sonymen qatar keıbir jerlerde jel kúsheıip, onyń ekpini sekýndyna 20 metr jyldamdyqqa jetedi, tuman túsip, kóktaıǵaq bolady dep boljanýda. Túnde aýanyń temperatýrasy 15-20°S deıin tómendep, keıbir jerlerde 22-25 °S aıaz bolady.
Qazaqstannyń ońtústik óńirlerinde osy apta boıy jaýyn-shashyn, keıbir jerlerde jańbyrdyń sońy qarǵa aınalady, aptanyń birinshi jartysynda tańǵy jáne keshki ýaqytta tuman túsedi. Aptanyń ekinshi jartysynda jel kúsheıip, aýanyń temperatýrasy tómendeıdi degen boljam bar.
