EQYU Sammıti kezinde Astanada bazarlardan basqa azyq-túlik dúkenderi men saýda ortalyqtary qalypty keste boınysha jumys isteıdi
ANA. 4 qarasha. QazAqparat /Gúlmıra Álıakparova/ - EQYU Sammıti ótetin 1-2 jeltoqsan kúnderi Astanada bazarlardan basqa, azyq-túlik dúkenderi men saýda ortalyqtary qalypty keste boıynsha jumys isteı beredi. Bul týraly óziniń jeke blogynda qala turǵyndarynyń saýaldaryna jaýap bergen Astana ákimi Imanǵalı Tasmaǵambetov málim etti.
«Azyq-túlik dúkenderi, dúńgirshikter men ózge de saýda oryndarynyń jumysyna qatysty eshqandaı shekteýler qarastyrylyp otyrǵan joq. Biraq qaladaǵy 24 bazar 29 qarashadan bastap 2 jeltoqsanǵa deıin jumystaryn toqtatyp, sanıtarlyq jáne tehnıkalyq kúnderge jabylady», - dep atap ótti ákim.
Sonymen birge qala basshysy, 1-2 jeltoqsan kúnderi elorda aýmaǵynan shyǵa beris jol jabylmaıtynyn, biraq ózge qalalardyń kólikterine qalaǵa kirýge shekteýler qoıylatyndyǵyn aıtty. Bul rette, kommýnaldyq qyzmetterdiń tehnologııalyq kólikterinen ózge, júk kólikterine qala ishimen júrýge tyıym salynady.
Sondaı-aq, 30 qarasha kúniniń ekinshi jartysynan 3 jeltoqsannyń tańyna deıin kelesi kóshelerdiń keıbir bólikteri ýaqytsha jabylyp otyrady: Áýejaıy kúre joly; Túrkistan kóshesi; Syǵanaq, Saraıshyq, Momyshuly, 1-shi jol; Turan; Qabanbaı batyr dańǵyly; Qorǵaljyn tas joly; Saryarqa; Abaı, Ýálıhanov; Táýelsizdik dańǵyly.
Atalmysh kósheler jabylǵan ýaqytta azamattarǵa kelesi baǵyttardy paıdalanýǵa keńes beriledi: Prıgorodnyı kentiniń ishimen áýejaıdyń aınalma jolyna deıin, Turan dańǵylynan - Syǵanaq, Orynbor, Táshenov kósheleri arqyly oń jaǵalaýǵa shyǵýǵa bolady.
Jańa ákimshilik ortalyqta turatyn adamdarǵa sondaı-aq, Syǵanaq kóshesi ashyq bolady. Ol arqyly Kereı men Jánibek kóshesimen Telman kentine deıin, odan ary aýyl ishi jolymen «Ońtústik» aınalma jolyna shyǵyp Abylaıhan dańǵyly men Qorǵaljyn tas jolyna jetýge bolady.
Taǵy bir baǵyt - Turan dańǵyly men Dostyq kósheleri arqyly Komsomol kentine, odan ary Qorǵaljyn tas jolyna shyǵyp, Kúmisbekov, Seıfýllın kósheleri arqyly kez-kelgen baǵytta qozǵalýǵa bolady.
Onymen birge I.Tasmaǵambetovtyń aıtýynsha, 29 qarasha men 3 jeltoqsan aralyǵynda EQYU sammıti ótetin «qyzyl aýmaqqa» alyp keletin joldardyń qozǵalysyna shekteýler qoıylady. Olar - A.Baıtursynov (41 kóshe), Nájimeden (42), Táýelsizdik dańǵyly (Syǵanaq kóshesinen Saraıshyqqa deıin), Obaǵan kóshesi (39), Syǵanaq (M-3 kópirinen Táýelsizdik dańǵylyna deıin) jáne Saraıshyq kóshesi (B.Momyshulynan Aınakól kóshesine deıin).
Bul aýmaqqa tek EQYU sammıtiniń delegatsııalaryna qyzmet etýshi kólikter arnaıy ruqsat qaǵazdary arqyly kire alady. Al «qyzyl aýmaqqa» engen «Haıvıll», «Grand Astana», «Qalalyq romans» turǵyn úı keshenderinde turatyn 850 avtokólik ıelerine Astana qalasynyń ІІD Jol polıtsııasy basqarmasynyń qyzmetkerleri ruqsat qaǵazdardy árqaısysynyń úıine aparyp tapsyratyn bolady. «Haıvıll» TK aýmaǵynan shyǵý Saraıshyq kóshesimen B.Momyshuly dańǵyly arqyly, Táýelsizdik, Abylaı han dańǵyldary arqyly basqa baǵyttar boıynsha júzege asyrylady. «Grand Astana» men «Qalalyq romans» TK-dan - Syǵanaq, Orynbor, Táshenov jáne basqa baǵyttar arqyly.
Bul rette, ákim 26-29 qarasha kúnderi qalanyń basqa aýmaqtarynda qozǵalystarǵa shekteý qoıylmaıtynyn qadap aıtty. Turǵyndardyń saýda-oıyn saýyq keshenderine, saýda ortalyqtary men medıtsınalyq mekemelerge júrip-turýy erkin bolady.
