EQYU Sammıti qarsańynda elordanyń «Saryarqa» aýdanyndaǵy meımandardy qabyldaıtyn nysandar tekserilýde

«Aldaǵy ótetin EQYU Sammıti qarsańynda elordadaǵy «Saryarqa» aýdanyna qarasty 31 nysandy (qonaqúıler, meıramhanalar) tekserdik. Qazirgi kezde 11 nysan meımandardy qabyldaýǵa 100 paıyzǵa daıyn», - dedi elordanyń «Saryarqa» aýdandyq tótenshe jaǵdaılar basqarmasynyń bastyǵy Marǵulan Amanbaev.

Onyń sózine qaraǵanda, bul tekseristiń negizgi talabynda meımandardy qabyldaýǵa arnalǵan nysandardyń órt sóndirý quraldarymen jabdyqtalýy, qosymsha esikterdiń erejege sáıkes ornatylýy, sondaı-aq sheteldik qonaqtarǵa túsinikti bolýy úshin nysan josparynyń qazaq, aǵylshyn jáne orys tilderinde jazylýy sekildi sharttar eskerilgen.

«Bul jumystar qaýipsizdik sharalary turǵysynda atqarylyp jatyr. Osyǵan oraı 31 nysannyń 21-indegi kemshilikterdi joıý úshin 15 qarashaǵa deıin uıǵarymdar jasadyq», - dedi ol. M. Amanbaev búginde daıarlyq deńgeıi óte tómen eki qonaqúıdiń isi ekonomıkalyq sotqa ázirlengenin jetkizdi. Bul qonaqúılerde órt qaýipsizdigi talaptary turyǵysyndaǵy sharalar atqarylmaǵan kórinedi.

«Atap aıtqanda, qazirgi kezde EQYU Sammıti men qysqy Azıada ótetin nysandarda aýqymdy oqý-jattyǵý jumystary júrgizilýde», - dedi basqarma bastyǵy.