EQYU Sammıti: Astanada Eýrazııanyń jańa keleshegi sóz boldy
ANA. 2 jeltoqsan. QazAqparat - Keshe Astanada Eýropadaǵy qaýipsizdik jáne yntymaqtastyq uıymynyń joǵary deńgeıdegi sammıti ashyldy.
Keńeske arqaý bolǵan negizgi taqyryp - Qart Qurlyqtaǵy qarý-jaraqtardy baqylaý jáne qaýipsizdikti qamtamasyz etý boldy. Germanııa men Frantsııa basshylary EQYU-daǵy senim daǵdarysy eńserilgenin, qarym-qatynasty jańa deńgeıge kóterý kerektigin buǵan deıin málim etken bolatyn, dep jazady Vestı.Ru saıty.
EQYU elderiniń basshylary sońǵy ret osydan 11 jyl buryn bas qosqan edi. Sarapshylar sammıtterdiń arasyndaǵy úzilistiń uzaqqa sozylýyn qatysýshy elderdiń kózqarastaryndaǵy qaıshylyqtarmen túsindiredi, qalaı degenmen Eýrazııa men Atlantıkanyń 56 memleketi birikken uıym ǵoı. Osylaısha, Astanadaǵy sammıt jańa ǵasyrda, jańa myńjyldyqta jáne «qyrǵıqabaq soǵys» týraly barlyq esteliktiń ornyna lańkestik pen aımaqtyq qaqtyǵystar sııaqty yǵyttar kelgen jańa álemdik jaǵdaıda ótip otyr.
Eýropadaǵy qaýipsizdik búginde tek onyń aıasymen shektelip otyrǵan joq. Sondyqtan da sammıtke halqynyń amanatyn arqalap kelgen Aýǵanstan Prezıdenti Hamıd Karzaı, Taýly Qarabaq problemasynyń salqynyn umyta qoımaǵan Ázirbaıjan men Armenııa prezıdentteri de qatysty. Eýropa men Azııanyń basyn qosyp otyrǵan Reseı bolsa, birigý bastamasyn kóterdi.
Dmıtrıı Medvedev usynǵan Eýropalyq qaýipsizdik týraly birtutas kelisimshart jańa EQYU-ǵa negiz bolýy múmkin.
«Kóterip otyrǵan bastamaǵa kórsetip otyrǵan qoldaýlaryńyzǵa alǵysymdy bildiremin. Ótkennen qalyp qoıǵan qasań qaǵıdalar áli de kúshin joıa qoımaǵan shyǵar jáne búgingi meniń bastamam merziminen buryn jasalyp otyrǵan shyǵar, biraq erte me, kesh pen bul kelisimsharttyń ýaqyty keletinine meniń kúmánim joq. 35 jyl buryn, «qyrǵıqabaq soǵystyń» kezinde bizdiń izasharlarymyz ıdeologııalyq qaıshylyqtardy umytyp, óz dáýirindegi revolıýtsııalyq sheshimdi qabyldaǵan bolatyn. Búginde eshqandaı ıdeologııalyq tosqaýyldar joq, áskerı qarsylyqtar da joq. Búgingi problemalardy sheshý úshin biz birige alamyz jáne solaı etýimiz kerek»,- dep málim etti Reseı Prezıdenti Dmıtrıı Medvedev Astanada sóılegen sózinde.
Qalaı birigý kerektigin Qazaqstan Prezıdenti Nursultan Nazarbaev usyndy. Uıymnyń aıasy Vladıvostoktan Vankýverge deıingi aýmaqpen shektelip qalmaýy kerek. «Biz qaýipsizdik pen yntymaqtastyqtyń jańa deńgeıine aýysyp otyrmyz. Tórt muhıttyń arasyndaǵy: Atlant muhıtynan Tynyq muhıtyna deıingi, Soltústik Muzdy muhıttan Úndi muhıtyna deıingi aralyqtaǵy qaýipsizdiktiń birtutas keńistigin qurý týraly sóz etip otyrmyz», dep atap kórsetti Qazaqstan Prezıdenti Nursultan Nazarbaev.
EQYU sammıtiniń bolashaǵyn memleket basshylary qol qoıatyn Birlesken deklaratsııa anyqtaıtyn bolady. Qalaı bolǵanda da, Astana sammıti tarıhqa EQYU-nyń Eýropadan tysqary jerde ótkizilgen birinshi májilisi retinde kiredi.
Al Astana bolsa - bul kúnderi Sammıt esimdi ul bala dúnıege kelgen jer retinde tanyldy. Dúnıege jańa kelgen nemeresine ata-ájesi Sammıthan degen esim berip otyr.
