EQYU Parlamenttik Assambleıasy Bıýrosynyń otyrysyna ázirlik jáne ony ótkizý jónindegi jumys tobynyń otyrysy boldy
ASTANA. 11 qarasha. QazAqparat - Búgin Senatta palata tóraǵasy Qasym-Jomart Toqaevtyń tóraǵalyq etýimen bıylǵy 30 qarashada Astanada EQYU Sammıtiniń aldynda bolatyn EQYU Parlamenttik Assambleıasy Bıýrosynyń otyrysyna ázirlik jáne ony ótkizý jónindegi jumys tobynyń otyrysy boldy.
Otyrysqa Parlament depýtattary, syrtqy ister mınıstriniń orynbasary K.Jıgalov, palata qyzmetteriniń basshylary qatysty.
Senat Apparatynyń jáne jumys tobynyń basshysy Murat Nurtileýov sharaǵa ázirliktiń 11 qarashaǵa deıingi jaǵdaıy týraly baıandady. Onyń aıtýynsha, aldaǵy Bıýro otyrysyna 48 delegat qatysatyny, olardyń ishinde EQYU PA Bıýrosynyń 15 múshesin qosa alǵanda, EQYU-ǵa qatysýshy memleketter Parlamentteriniń 25 depýtaty bar ekeni naqtylandy.
EQYU Parlamenttik Assambleıasynyń Prezıdenti P.Eftımıý óziniń aldaǵy sharaǵa qatysatynyn naqtylady.
Assambleıa basshylyǵy men onyń músheleri Parlamenttik Assambleıa jáne Uıymnyń qazirgi qyzmetine, taıaý keleshektegi jumys josparyna qatysty aýqymdy máselelerdi talqylaıtyn bolady.
Odan basqa, EQYU Parlamenttik Assambleıasynyń depýtattary Eýrazııalyq qoǵamdastyq aldynda turǵan jáne Qazaqstannyń tóraǵalyq etýindegi basym baǵyttar retinde belgilengen ózekti máseleler jóninde pikir almasatyn bolady.
