EQYU PA Venadaǵy Qysqy sessııasyna qatysyp jatqan QR Parlament Senatynyń Tóraǵasy Qasym-Jomart Toqaev Aýstrııa Respýblıkasy Ulttyq Keńesiniń basshysy Barbara Prammermen kezdesti
STANA. Aqpannyń 19-y. QazAqparat. Búgin EQYU Parlamenttik Assambleıasynyń Venadaǵy Qysqy sessııasyna qatysyp jatqan QR Parlament Senatynyń Tóraǵasy, EQYU Parlamenttik Assambleıasynyń vıtse-prezıdenti Qasym-Jomart Toqaev Aýstrııa Respýblıkasy Ulttyq Keńesiniń basshysy Barbara Prammermen kezdesti,
dep habarlaıdy Senattyń baspasóz qyzmeti.
Kezdesý barysynda ekijaqty, onyń ishinde eki eldiń zań shyǵarýshy organdary arasyndaǵy qatynastardy belsendilendirý joldary talqylandy.
«Aýstrııa Qazaqstannyń Eýropadaǵy saıası jáne ekonomıkalyq mańyzdy áriptesteriniń biri bolyp tabylady»,-dedi Tóraǵa.
«Qazaqstan Aýstrııany EQYU-daǵy negizgi áriptesteriniń biri retinde qarastyrady jáne biz EQYU-na tóraǵalyq etý baǵdarlamasyn júzege asyrý aıasyndaǵy bizdiń usynystarymyzdy qoldaıtynyna senim artamyz»,-dedi Q.Toqaev.
Tóraǵanyń aıtýynsha, qazaqstandyq tóraǵalyq etýdiń strategııalyq maqsaty 2010 jyly EQYU Sammıtin ótkizý bolyp otyr. Sammıt taqyryby qaýipsizdiktiń ózekti problemalary, Aýǵanstandaǵy jaǵdaı, toleranttyq máseleleri bolýy yqtımal.
Q.Toqaev Prezıdent N.Nazarbaevtyń Qazaqstan halqyna Joldaýy týraly B.Prammerdi habardar etip, «bul Joldaý tarıhı qujat bolyp otyr, onda Qazaqstannyń 2020 jylǵa deıingi strategııalyq damý baǵyttary negizge alynǵanyn» atap ótti.
Ol Aýstrııa Ulttyq Keńesiniń tóraǵasy, EQYU Parlamenttik Assambleıasyndaǵy aýstrııalyq delegatsııanyń basshysyn Qazaqstanǵa saparmen kelýge, ol saparynda parlamentshilerdiń Transazııalyq jıynyna qatysýǵa shaqyrdy.
B.Prammer óz kezegende eki el arasyndaǵy yntymaqtastyqty nyǵaıtý jaıynda aıta kelip, 2010 jyly EQYU Sammıtin ótkizý týraly usynysty qoldaıtynyn bildirdi.
