EQYU Ortalyǵy Qazaqstannyń Halyqaralyq eńbek uıymynyń birqatar konventsııalaryna qosylýyna járdemdesedi - EQYU Ortalyq basshysy
aýsymnyń 18-i. QazAqparat /Qanat Mámetqazyuly/ - EQYU Ortalyǵy Qazaqstannyń Halyqaralyq eńbek uıymynyń birqatar konventsııalaryna qosylýyna járdemdesedi.
Bul týraly búgin QR Parlamenti Senatynda «Qazaqstan Respýblıkasyndaǵy kóshi-qon protsesteri jáne kóshi-qon salasyndaǵy zańnamany jetildirý perspektıvalary» taqyrybyna arnalǵan ǵylymı-praktıkalyq konferentsııa barysynda Astanadaǵy EQYU Ortalyǵynyń basshysy, Elshi Aleksandr Kelchevskıı málim etti.
Elshiniń aıtýynsha, aǵymdaǵy jyly EQYU Ortalyǵy negizgi maqsaty Qazaqstannyń Halyqaralyq eńbek uıymynyń basqa da konventsııalaryna qosylýyna járdemdesýge arnalǵan jańa jobaǵa bastama jasaǵan. Bul HEU-nyń eńbek mıgranttary týraly konventsııa, kóshi-qon salasyndaǵy teris paıdalanýlar týraly jáne eńbek mıgranttarynyń teń quqyqtary men birdeı múmkindikteri týraly konventsııalar bolyp tabylady.
«Joba aıasynda aǵymdaǵy zańdylyq máselesine saraptama jasalyp, atalǵan konventsııalardy ratıfıkatsııalaýǵa daıyndyq jumystary júrgizilýde. Biz ázirlengen usynymdar Qazaqstanǵa jaqyn keleshekte eńbek mıgratsııasy salasyndaǵy negizgi kelisimderge qosylýyna múmkindik beredi dep senemiz. Bul shara atalǵan baǵyttaǵy ulttyq zańnamany kúsheıtýge de septigin tıgizedi. Sondyqtan da, Parlament depýtattaryn, basqa da uıymdardy osy máselege atsalysýǵa shaqyramyz», dedi Ortalyq basshysy.
