EQYU-nyń májilisinde Ortalyq Azııadaǵy ekologııalyq máselelerdi sheshýdiń birqatar nusqalary usynylady
/strong>Sáýirdiń 7-si. QazAqparat /Názıra Eleýhan/- EQYU Tóraǵasynyń ekologııa jáne qorshaǵan orta máseleleri jónindegi jeke ýákili, Eýropalyq Parlamenttiń depýtaty Strýan Stıvenson bıyl jyl sońyna deıin Ortalyq Azııa elderin aralap shyqpaq. Bul búgin Almatyda ótken baspasóz máslıhatynda aıtyldy,
dep habarlaıdy QazAqparat.
«Maǵan Ortalyq Azııadaǵy ekologııalyq máselelerdiń keńeıtilgen esebin daıyndaýǵa tapsyrma berilgen edi. Sol sebepten, bıylǵy jyly men Tájikstan, Ózbekstan jáne Qazaqstannyń barlyq jerin aralap, ásirese, álemniń eń iri ekologııalyq apatyna ushyraǵan - Aral teńizi men Semeı polıgonynda az degende, bir apta ótkizýdi josparlap otyrmyn. Buǵan deıin men Qyrǵyzstan men Túrikmenstan elderinde bolyp qaıttym. Meniń qorytyndy esebim kúzde Venada ótetin EQYU-nyń plenarlyq májilisinde usynylady. Jıynda, Ortalyq Azııadaǵy qorshaǵan orta men ekologııaǵa jaǵymsyz áser etetin mańyzdy máselelerdi sheshýdiń birqatar nusqalaryn usynamyn dep úmittenemin», dedi S.Stıvenson.
Ol sonymen qatar, «Sońǵy jyldary EQYU-na múshe elder ekologııalyq faktordyń memlekettiń qaýipsizdigi men ult densaýlyǵyna yqpalynyń artýyna alańdaýshylyq bildirýde», dep atap ótti.
Strýan Stıvenson sońǵy 11 jyl boıy Semeıde radıatsııadan zardap shekkenderge kómek kórsetýge arnalǵan halyqaralyq kompanııany basqaryp keledi. 2004 jyly qyrkúıek aıynda ol Semeı jerinde 40 jyl boıy júrgizilip kelgen polıgon áserinen zardap shekken adamdar týraly jazǵan "Vechnaıa skorb" shyǵarmasy úshin, halyqaralyq baıqaýdan 50 myń AQSh dollaryn jeńip alǵan bolatyn. Bul qarajatty depýtat Shotlandııanyń qaıyrymdylyq Korpýsyna, Semeı turǵyndaryna kómek kórsetý úshin berdi. Al, 2006 jyly ol osy kitapty basyp shyǵaryp, satýdan túsken qarajatty Semeıdegi balalar emhanasyna aýdardy.
