EQYU-nyń qazirgi tóraǵasy Q. Saýdabaev Ońtústik Kavkaz elderine sapar jasaıdy
ASTANA. Aqpannyń 12-si. QazAqparat /Ernur Aqanbaı/ - Aqpannyń 14-i men 17-si aralyǵynda EQYU-nyń qazirgi tóraǵasy, QR Memlekettik hatshysy-Syrtqy ister mınıstri Qanat Saýdabaevtyń Ońtústik Kavkaz elderine, atap aıtqanda Ázirbaıjan, Armenııa jáne Grýzııa memleketterine sapary ótedi. Bul týraly búgin Astanadaǵy brıfıngte QR Syrtqy ister mınıstrliginiń resmı ókili Asqar Ábdirahmanov málim etti,
dep habarlaıdy QazAqparat.
«Bakýge, Erevanǵa jáne Tbılısıge saparlardyń barysynda EQYU-nyń qazirgi tóraǵasynyń aımaqtaǵy úsh memlekettiń joǵarǵy basshylyǵymen, parlament spıkerlerimen jáne saıası partııalardyń jetekshilerimen kezdesýleri ótedi. Kelissózder barysynda Ońtústik Kavkazdaǵy qaýipsizdik pen turaqtylyqty ornatýdaǵy kókeıkesti máseleler, sonyń ishinde aımaqtaǵy qazirgi janjaldardy retteýge járdemdesý, qalyptasqan problemalardy sheshýdegi EQYU-nyń rólin kúsheıtý máseleleri talqylanady», dedi A. Ábdirahmanov.
Onyń aıtýynsha, EQYU keńistigindegi sozylyp ketken janjaldardy retteýge járdemdesý, Ońtústik Kavkazdaǵy elderdiń qaýipsizdigin arttyrý Qazaqstannyń EQYU-ǵa tóraǵalyǵynda aıryqsha nazarda bolady. Sondyqtan da Uıymnyń qazirgi tóraǵasy atalmysh óńirge sapar jasaǵaly otyr.
