EQYU-nyń qaýipsizdik ınstıtýtyn qurý kezinde jergilikti mamandarǵa kóbirek basymdyq berý kerek - saıasattanýshy Ázimbaı Ǵalı
ALMATY. 2 jeltoqsan. QazAqparat /Erlik Erjanuly/ - Saıasattanýshy Ázimbaı Ǵalıdyń paıymdaýynsha, qazir qarama-qaıshylyqtardy sheshý kezinde, máseleniń túıinin tarqatýdan kóri onyń aldyn alýdyń tıimdi ekenine eldiń báriniń kózi jetip otyr.
Sondyqtan Elbasynyń EQYU Sammıtinde uıym sheńberinde qaýipsizdik boıynsha ártúrli problemalardy boljaý jumystaryn atqaratyn ınstıtýttardy qurý jónindegi usynysy máseleniń túıinin tarqatýǵa jasalǵan mańyzdy qadam bolmaq.
"Qazir Aýǵanstannan shyǵatyn esirtkiniń 70-80 paıyzy Ortalyq Azııa arqyly Reseıge, odan Batys Eýropa elderine taralady. Bul - máseleniń bir jaǵy ǵana. Al dinı ekstremızm, lańkestik sııaqty ózge de áleýmettik túıtkildi máseleler de qazir óziniń ózektiligin joıǵan joq. Sondyqtan jańadan qurylatyn qaýipsizdik ınstıtýtynda júıeli áleýmettik, saıası jáne tarıhı zertteý jumystaryn júrgizý kerek. Onda eń aldymen jergilikti mamandardyń jumys jasaýyna erekshe kóńil bólý qajet. Sebebi qazir mundaı ınstıtýttarda zertteý jumysyn kóp jaǵdaıda jergilikti halyqtyń tili men dilinen maǵlumaty az adamdar júrgizip júr. Qazaq tilin bilmeı - Qazaqstandy, qyrǵyz tilin bilmeı - Qyrǵyzstandy zerttep jáne musylmandyqtyń negizin bilmeı ıslamǵa sıpattama berip júrgender bar", deıdi tarıh ǵylymynyń doktory Ázimbaı Ǵalı.
Onyń aıtýynsha, Qazaqstandaǵy mamandardyń deńgeıi qazir jaman emes. Búgingi tańda sarapshylardyń jańa býyny qalyptasyp úlgerdi. Jalpy barlyq másele qazir mamandardyń biliktiligine baılanysty.
