EQYU-na tóraǵalyq barysynda biz senim, dástúr, tózimdilik sııaqty uǵymdardy uran etip ustaımyz - Q.Saýdabaev
ASTANA. Qańtardyń 20-sy. QazAqparat /Aıdar Ospanalıev/ - «Qazaqstan Eýropadaǵy qaýipsizdik pen yntymaqtastyq uıymyna aımaqtaǵy bedeldi derjava mártebesine ıe, órkenıetaralyq dıalogtyń lıderi, jańa zaman tarıhynda qandaı da bir qaqtyǵystardy nemese qaıshylyqtardy bastan ótkermegen postkeńestik keńistiktegi turaqty memleketterdiń biri retinde tóraǵalyq etkeli otyr», dedi búgin Memlekettik hatshy- Syrtqy ister mınıstri Qanat Saýdabaev.
Bul týraly ol búgin dıplomatııalyq korpýs ókilderimen kezdesýi barysynda málim etti, dep habarlaıdy QazAqparat.
«Búginde Qazaqstannyń geosaıasattaǵy róli myqty ekonomıkaǵa negizdelip otyr. Biz senimdi túrde ózimizdi jahandyq energetıkalyq tepe-teńdikti qalyptastyratyn, aımaqtaǵy jańa energetıkalyq derjava retinde ornyqtyryp otyrmyz. Bizdiń ekonomıkamyzdyń turaqtylyǵynyń kepili retinde elimiz álemde alǵashqylardyń biri bolyp óte az mólsherdegi shyǵyndarmen jahandyq ekonomıkalyq daǵdarystan shyǵa bildi. Bizdiń tóraǵalyq mıssııamyz EQYU-nyń aldyndaǵy úlken jaýapkershilik dep bilemin. Biz atalmysh uıymdy onyń aıasyndaǵy qaýipsizdikti qamtamasyz etýge laıyqty úles qosamyz degen umtylyspen basqarǵaly otyrmyz», dedi Memlekettik hatshy.
Bul rette ol Qazaqstannyń tóraǵalyǵy tusynda basty urandarynyń biri tórt «t» bolatyndyǵyn atap kórsetti. «Onyń birinshisi «trast» ıaǵnı senim, ekinshisi «tradıshn», ıaǵnı dástúr, úshinshisi «transparensı», ıaǵnı transparenttlik, tórtinshisi «tolerans», ıaǵnı tózimdilik», dedi Q.Saýdabaev.
