EQYU konferentsııasynda Qazaqstannyń tsıfrlyq tehnologııalardy engizý tájirıbesi tanystyryldy

ASTANA. QazAqparat - Tsıfrlyq ǵasyrǵa arnalǵan sybaılas jemqorlyqqa qarsy strategııalardy daıyndaý máseleleri jónindegi EQYU (Eýropadaǵy Qaýipsizdik jáne Yntymaqtastyq Uıymy) konferentsııasynda Qazaqstannyń sybaılas jemqorlyqqa qarsy is-qımyl, onyń ishinde osy protseske tsıfrlyq tehnologııalardy engizý tájirıbesi tanystyryldy, dep habarlaıdy QazAqparat.

Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenovtiń basshylyǵymen qazaqstandyq delegatsııa Rımde (Italııa) ótken atalmysh EQYU konferentsııasyna qatysty.

Oljas Bektenov Eýropa, Ortalyq Azııa jáne Soltústik Amerıkanyń 57-den astam memleketiniń delegatsııalaryn Qazaqstannyń sybaılas jemqorlyqqa qarsy is-qımyl, onyń ishinde osy protseske tsıfrlyq tehnologııalardy engizý tájirıbesimen tanystyrdy.

«Búgingi kúni memlekettik apparattyń azamattarmen ózara qarym-qatynasy «klıentke baǵdarlaný», qyzmet alýdyń ashyqtyǵy men qol jetimdiligi qaǵıdattarynda qurylýda. Bizdiń aldaǵy 2 jylǵa arnalǵan maqsatty ındıkator - 90% elektrondyq qyzmet kórsetý, al 10% - tek qana «bir tereze» qaǵıdaty boıynsha qyzmet kórsetý», - dedi ol.

Onyń aıtýynsha, memlekettik qyzmet kórsetý kezinde azamattardyń quqyqtaryn, bostandyqtary men zańdy múddelerin qorǵaýǵa erekshe kóńil bólinedi.

Ol sondaı-aq, «Tsıfrlyq agent» mobıldi qosymshasy arqyly qazaqstandyqtardyń shaǵym berýge nemese kórsetilgen qyzmettiń sapasyn baǵalaýǵa múmkindikteri bar ekendigin atap ótti.

Eýropalyq alańda alǵash ret qoǵamdyq baqylaýdyń ınteraktıvti kartasy tanystyryldy.

«Biz ózimizge mynadaı qaǵıdatty ornattyq: Bizdiń belsendi jaqtastarymyz kóbeıgen saıyn, sybaılas jemqorlyqqa qarsy saıasat soǵurlym tıimdi bolady. Qabyldanǵan sharalardy jetildirý úshin qoldanylatyn tetikterdi biriktirý jáne sybaılas jemqorlyqtyń aldyn alýdyń keshendi quralyn qurý týraly sheshim qabyldandy.

Osylaısha biz qoǵamdyq baqylaýdyń ınteraktıvti kartasyn jasaýǵa bel býdyq. Búgingi tańda karta 150 mlrd teńgeden astam bıýdjettik shyǵyndar týraly egjeı-tegjeıli aqparatty qamtıdy», - dedi Oljas Bektenov.  

Atalǵan resýrs arqyly azamattar bıýdjet qarajatynyń jumsalýyn baqylaýǵa tikeleı qatysýǵa múmkindik alatyndyǵy aıtyldy.

Halyqaralyq uıymdar men shetel ókilderi sybaılas jemqorlyqqa qarsy is-qımylda aqparattyq tehnologııalardy paıdalanýdyń qazaqstandyq tájirıbesin oń baǵalady.

«Biz Qazaqstannyń uıymǵa kirý máselesi boıynsha aıtarlyqtaı ilgeriledik. Qazaqstan jaqynda GREKO - ge qosylady dep úmittenemiz», - dep atap ótti Eýropa Keńesiniń Sybaılas jemqorlyqqa qarsy memleketter tobynyń (GREKO) atqarýshy hatshysy Djanlýka Espozıto.