EQYU Qazaqstanda ótken prezıdent saılaýynyń nátıjelerimen tanysty
ASTANA. QazAqparat - 30 sáýirde Vena qalasyndaǵy Eýropadaǵy qaýipsizdik jáne yntymaqtastyq uıymynyń shtab-páterinde negizgi sheshim qabyldaıtyn organ - Turaqty keńestiń kezekti otyrysy ótti, dep jazady QR SІM resmı saıty.
Otyrys barysynda EQYU-daǵy Qazaqstan delegatsııasynyń basshysy - QR-dyń Vena qalasyndaǵy halyqaralyq uıymdar janyndaǵy Turaqty ókili Qaırat Sarybaı 26 sáýirde Qazaqstanda ótken Prezıdenttik saılaýdyń qorytyndylary boıynsha baıandama jasady. Qazaqstandyq dıplomat EQYU-ǵa múshe qatysýshy-memleketterdiń delegatsııalaryna is basyndaǵy Prezıdent Nursultan Nazarbaev 97,7% daýys jınap senimdi jeńiske jetkenin, al QR Kommýnıstik halyq partııasynan saılaýǵa túsken Turǵyn Syzdyqov 1,6% jáne Qazaqstan Kásipodaq federatsııasynyń tóraǵasy Ábilǵazy Qusaıynov 0,64% daýysqa ıe bolǵanyn habarlady.
Óz tańdaýyn eliniń saıası turaqtylyǵy, qaýipsizdigi jáne damýyna, sondaı-aq Prezıdent N.Nazarbaevtyń basshylyǵymen iske asyrylyp jatqan reformalarǵa baǵyttaǵan daýys berýshilerdiń saılaýǵa belsendi qatysýy Qazaqstan azamattarynyń joǵary quqyq mádenıeti men saıası belsendiliginiń kórsetkishi bolǵany atap ótildi.
Turaqty keńes Prezıdent N. Nazarbaevtyń baǵdarlamasy, bes ınstıtýttsıonaldy reformalarynyń iske asyrylýy týraly jospar men osy maqsatta qurylǵan jańartý boıynsha Ulttyq komıssııa jóninde aqparattandyryldy.
Otyrysqa qatysýshylar 37 memleket pen 7 halyqaralyq uıym atynan qatysqan halyqaralyq baqylaýshylardyń baǵalarymen tanysty. Baqylaýshylardyń basym bóliginiń pikiri boıynsha, saılaýdyń halyqaralyq standarttar men Qazaqstan Ata Zańynda qarastyrylǵan normalar men qaǵıdattarǵa saı ashyq jáne ádil ótti.
EQYU DIAQB baqylaýshylar mıssııasynyń esebine qatysty Elshi atalǵan betkeustar uıymmen yntymaqtastyq qurýdyń jáne onyń bilimi men tájirıbesin keńinen paıdalanýdyń mańyzdylyǵyna nazar aýdardy.
Otyrys barysynda birqatar basqa da delegatsııalar baıandama jasady. AQSh jáne EO Qazaqstannyń negizgi seriktesi ekenin atap ótti jáne saılaý máselelerin qosa alǵanda, barlyq salada yntymaqtastyqty belsendi túrde damytýǵa daıyn ekenderin jetkizdi.
Reseı, Belarýs, Qyrǵyzstan, Tájikstan jáne Túrikmenstan delegatsııalarynyń baıandamalarynda saılaýdyń uıymdastyrylýy men ótkizilýine joǵary baǵa berildi. Sondaı-aq daýys berýshilerdiń belsendiligi men biraýyzdan is basyndaǵy Prezıdentke qoldaý kórsetkeni jóninde atap ótildi.
