«EQYU-ǵa tóraǵalyq Qazaqstanǵa úlken jaýapkershilik júkteıdi» - respýblıkalyq basylymdarǵa sholý

***

«Qos shatyrly parlamenttiń «Barys jylyndaǵy» birinshi jalpy otyrystaryna jınalǵan Tómengi palatasynda EQYU-nyń tizgini qazaq eliniń qolyna kóshýine qatysty biraz málimdemeler jasaldy. Májilistiń jańa jyldaǵy alǵashqy otyrysyn ashqan palata tóraǵasy Oral Muhamedjanovtyń pikirinshe, bul shara bıylǵy jylǵy «elimiz úshin asa mańyzdy oqıǵa» retinde baǵalanýǵa tıis. Al Májilis depýtaty Zeınolla Alshymbaevtyń baılamynsha, bul jas memleketimizdiń «álemdik saıasattaǵy jeńisteriniń jemisi!», dep jazady «Aıqyn» gazeti. Jazylǵan jaıtty egjeı-tegjeıli bilgińiz kelse, osy basylymda jaryq kórgen «Adam tánin emes, janyn emdep júrgender» kim?» atty maqalany oqyńyz.

Keshe elordanyń barlyq emhanalarynda «Nur Otan» HDP-nyń partııalyq baqylaý beketteri ashyldy. Osyǵan oraı «Aıqyn» gazetinde jarııalanǵan maqalada atalǵan partııa Tóraǵasynyń birinshi orynbasary Nurlan Nyǵmatýlın men Densaýlyq saqtaý mınıstri Jaqsylyq Dosqalıevtiń qaladaǵy Medıtsınalyq aqparattyq-taldaý ortalyǵynyń Saýyqtyrý bıýrosynda bolǵandyǵy aıtylǵan.

Bul aıtýly shara «Lıter», «Ekspress K», «Vechernıaıa Astana» basylymdarynda da egjeı-tegjeıli jazylǵan.

QR Memlekettik hatshysy - Syrtqy ister mınıstri Qanat Saýdabaevtyń EQYU-nyń tóraǵasy retindegi Venaǵa jasaǵan alǵashqy sapary Avstrııanyń eýropalyq jáne halyqaralyq ister jónindegi federaldyq mınıstri Mıhael Shpındeleggermen kezdesýden bastaldy. Aıtýly sharaǵa oraı «Aıqyn» basylymynyń beısenbilik nómirinde «EQYU-ǵa tóraǵalyq Qazaqstanǵa úlken jaýapkershilik júkteıdi» degen taqyryppen kólemdi maqala jaryq kórdi.

***

«Bul jobalar burynǵydan ózgerek». Osy taqyryppen «Astana aqshamy» basylymynda kólemdi maqala jaryq kórdi. Basylymnyń jazýynsha, Astana qalalyq ákimdigi Abaıǵa jáne Jánibek pen Kereı hanǵa elordada qoıylatyn eskertkishterdiń jobasyna arnalǵan respýblıkalyq konkýrs jarııalaǵan. Jeltoqsannyń 1-i men qańtardyń 8-i aralyǵynda ótken ashyq baıqaýǵa elimizdiń ár aımaǵynan 30 týyndy túsken. Olardyń ishinde 10 joba qazaq handaryna, al 20-sy Abaıdyń tulǵasyn somdaýǵa arnalǵan. Keshe qala ákimi I.Tasmaǵambetov tóraǵalyq etken baıqaý músheleri jeńimpazdardy jarııalady. Sonymen elorda tórinde asqaqtaıtyn eskertkishterdiń avtorlary kim, olar qalanyń qaı jerine ornatylady, músinder neden jáne qaıda jasalady degen saýaldar mazalasa, basylymda jaryq kórgen maqalany oqyńyz.

Osy basylymda jaryq kórgen kelesi maqala «Azıadaǵa 380 kún qaldy» degen taqyryppen basylǵan. Onda «Aq olıpıada» degen janama ataýy bar baıraqty básekeniń tarıhyna, onyń 2011 jyly elimizdegi ashylý jáne jabylý saltanattary Astana men Almaty qalalarynda ótetindigine, sonymen qatar salynyp jatqan nysandarǵa sholý jasalǵan.

«Astana aqshamy» basylymynyń dástúrli «Áleýmet saýaly - ákim jaýaby» aıdarynda elorda ákimi I.Tasmaǵambetov qala halqynyń qoıǵan saýaldaryna tuşymdy jasap bergen.

***

«Bizdiń zamanymyzdyń qaharmany kim?». «Nur Astana» gazetiniń osy saýalyna birqatar azamattar jaýap bergen. Máselen, L.Gýmılev atyndaǵy Eýrazııa ulttyq ýnıversıtetiniń prorektory Dıhan Qamzabekuly Álıhan Bókeıhanovty, Mustafa Shoqaıdy, Halel Dosmuhambetovti, al Túrkistan gazetiniń tilshisi Dınara Myńjasarqyzy Toqtar Áýbákirovti zamanymyzdyń qaharmany sanaıtyndyqtaryn aıtqan.

***

«Ekonomıka» gazetiniń jazýynsha, Bolgarııa eliniń «Standart» atty aǵylshyn tilinde jaryq kóretin gazetinde jeltoqsannyń 16-sy kúni «Qazaqstan «Býrgas-Aleksandropýlos» jobasyna qatysýǵa áli kelisken joq» atty materıal shyqqan. Onda basylymǵa suhbat bergen QR Syrtqy ister mınıstrligi konsýldyq departamenti basshysynyń orynbasary tıisti suraqqa jaýap berý barysynda osyndaı pikir bildirgen.

«Qamdanǵan qapy qalmaıdy» degen naqyldy berik ustanǵan Úkimet ótken jyly der kezinde qımyldap, basty ekonomıkalyq kórsetkishterdiń quldyraýyna jol bermedi. Al bıyldan bastap elimizdiń halyq sharýashylyǵy eńsesin tiktep, ósip-órkendeýdiń dańǵyl jolyna túspekshi. Úkimettiń esebinshe ústimizdegi jyly Qazaqstan ekonomıkasynyń ósimi 2,4 paıyzdy quramaq. Mundaı boljam 2010 jyly munaıdyń ortasha álemdik baǵasy 50 AQSh dollaryn, 2011-2014 jyldary 60 AQSh dollaryn quraıdy degen negiz boıynsha jasalyp otyr dep túıindeıdi aqparat kózderi», dep jazady «Ekonomıka» gazeti. Aıtylǵan jaıttyń egjeı-tegjeıin basylymda jaryq kórgen «Ekonomıkalyq ósim saqtalady» atty maqaladan bile alasyzdar.

***

«Keshe Avstrııa astanasynda Qazaqstannyń EQYU tóraǵasy laýazymyna kirisýine baılanysty gala-kontsert ótti», dep jazady «Kazahstanskaıa pravda» gazeti. Basylymnyń jazýynsha, búgin Memleket basshysy Nursultan Nazarbaev EQYU Turaqty keńesiniń arnaıy otyrysyna qatysýshylardyń aldynda beınejoldaý arqyly sóz sóıleıdi dep kútilýde. Odan keıin QR Memlekettik hatshysy - Syrtqy ister mınıstri Qanat Saýdabaevqa sóz beriledi.
Keshegi jumys baǵdarlamasy barysynda elimizdiń syrtqy saıasat vedomstvosynyń basshysy Avstrııa Respýblıkasynyń federaldyq prezıdenti Haınts Fıshermen kezdesti. Kezdesý barysynda taraptar ekijaqty yntymaqtastyqtyń perspektıvaly baǵyttary jáne aǵymdaǵy jylǵy jaǵdaıy jaıynda pikir almasty. Sondaı-A Q.Saýdabaev Avstrııa Prezıdentine Elbasy N.Nazarbaevtyń aǵymdaǵy jyly Qazaqstanǵa shaqyrýyn tabys etti.

Osy taqyrypty qaýzaǵan materıaldar «Lıter», «Ekspress K», «Vechernıaıa Astana» gazetterinde de jaryq kórdi.

«Qazaqstan álemniń 133 eliniń ishinen óziniń kólik ınfraqurylymynyń sapasy boıynsha 69-shy oryndy alady», dep jazady «Lıter» gazeti. Basylymnyń jazýynsha, bul básekelestiktiń jahandyq ındeksin esepteıtin Búkilálemdik ekonomıkalyq forýmnyń baǵasy. Taıaý 5 jyldyqta respýblıkada jalpy quny 2,4 trln. teńgeni quraıtyn 56 joba júzege asady. Bul óz kezeginde atalǵan reıtıngtegi kólik ınfraqurylymynyń ustanymyn birshama jaqsarta túsedi. Atalǵan málimetterdi keshe Úkimet basshysy Kárim Másimovtiń qatysýymen ótken QR Kólik jáne kommýnıkatsııa mınıstrliginiń keńeıtilgen alqasynda sóz sóılegen kólik vedomstvosynyń basshysy Ábilǵazy Qusaıynov bildirgen.