«EQYU-ǵa tóraǵalyq – Elbasynyń erlikke para-par eńbeginiń jemisi» - respýblıkalyq basylymdarǵa sholý

«Memleket basshysy Nursultan Nazarbaev Qaraǵandy oblysynyń ákimi Serik Ahmetovti qabyldady», - dep jazady «Egemen Qazaqstan» gazeti búgingi sanynda. Qabyldaýda S.Ahmetov Prezıdentti oblystyń aǵymdaǵy jylǵy 9 aıdaǵy áleýmettik-ekonomıkalyq damýynyń qorytyndylary týraly habardar etti. Sondaı-aq kezdesý barysynda ónerkásip óndirisiniń ósimi 105,6 paıyzdy quraǵany, óńirdiń ekonomıkasynyń bazalyq salalaryn damytý jónindegi barlyq másele tabysty sheshimin taýyp jatqany atap ótildi. Oblys ákimi údemeli ındýstrıalandyrý memlekettik baǵdarlamasy aıasyndaǵy jobalardy iske asyrý barysy týraly esep berdi. Qazirgi ýaqytta birinshi jarty jyldyqta paıdalanýǵa berilgen barlyq nysandar tabysty jumys isteýde. Aǵymdaǵy jyldyń aıaǵyna deıin iske asyrylatyn jobalar erekshe baqylaýǵa alynǵan.

Qazannyń 20-synda elordada Qazaqstan halqy Assambleıasynyń XVI sessııasy ótkeni belgili. Bul jolǵy sessııanyń bir ereksheligi - oǵan Búkilálemdik rýhanı mádenıet forýmyna kelgen sheteldik meımandardyń qatysýy boldy. Elbasynyń sessııa barysynda sóılegen sózdi qatysýshylar tarapynan zor qyzyǵýshylyq týdyrǵan bolatyn. osyǵan oraı «Egemen Qazaqstan» gazetiniń juma kúngi nómirinde el azamattarymen qatar sheteldik birqatar mártebeli qonaqtyń pikir-lebizderi jarııalandy. Máselen, AQSh-tyń túsinistik jobasynyń dırektory Rodjer Nelson: «Álemniń basqa elderinde, sonyń ishinde AQSh-ta halyq assambleıasy bolmaǵandyqtan, men osyǵan deıin onyń qyzmetin durys túsinbeıtinmin. Alaıda, Qazaqstanǵa kelgennen keıin, onyń ústine búgingi Qazaqstan halqy Assambleıasynyń sessııasyna qatysqannan keıin mundaı uıymnyń qanshalyqty qajet ekenin uǵyndym. Prezıdent Nursultan Nazarbaev eli birligin nyǵaıtýda, rýhanı mádenıettilikpen ushtasatyn ultaralyq únqatysýdy jáne otansúıgishtik rýhty kóterýge barynsha jumystanyp jatqanyn júregimmen sezindim», - deıdi. Basqa da sheteldik qonaqtardyń, el azamattardyń oı-pikirlerin bilgińiz kelse, basylymnyń búgingi nómirin jiberip almańyz.

***

«Aıqyn» gazetiniń jazýynsha, Joǵarǵy palatanyń keshegi jalpy jıynynda senatorlar Ádilet mınıstrliginiń basshylyǵyna ókpe-nazdaryn bildiripti. Eń qyzyǵy sol, Rashıd Túsipbekov osy mınıstrliktiń tizginin óz qolyna alǵaly beri, birde-bir ret Senatta tóbe kórsetpegen eken! Muny jıyn barysynda senator Svetlana Jalmaǵanbetova aıtqan. Mınıstrliktiń jaýapty hatshysy Marat Beketaevtiń aıtýyna qaraǵanda, mınıstr syrqattanyp qalǵan. «Osylaısha mınıstr úshin daıyndalǵan baıandamany jaýapty hatshy shyp-shyrǵasyn shyǵarmaı, sózbe-sóz oqyp berdi. Osyǵan qanaǵattanǵan Joǵarǵy palata Olımpıada sımvoldaryn saýda belgisine aınaldyrýǵa jáne bas paıda tabýǵa paıdalanýǵa tyıym salatyn shartty bekitip, Elbasynyń qol qoıýyna uzatty. Áıtkenmen, artynsha, aldyǵa «zańdyq qujattardy týdyrý» qyzmetin jetildirý máseleleri boıynsha ulttyq zańnamany ózgertetin zańjoba tartylǵanda, senatorlarǵa taǵy da Ádilet mınıstrligindegilerge renjýge týra kelgen», dep jazady basylym. Maqalanyń tolyq nusqasyn búgingi nómirdegi «Mınıstr Senatqa kelýdi ar sanaı ma?» degen taqyryppen berilgen maqaladan oqı alasyzdar.

Osy basylymnyń dástúrli «Aq sóıle!» aıdarynyń búgingi qonaǵy - tarıh ǵylymynyń kandıdaty Dosaly Salqynbek. Odan alynǵan suhbat «EQYU-ǵa tóraǵalyq - Elbasynyń erlikke para-par eńbeginiń jemisi» degen taqyryppen jarııalanǵan. Qoıylǵan saýaldardyń barlyǵyna tuşymdy jaýap bergen D. Salqynbek: «Jalpy alǵanda, Qazaqstannyń EQYU-ǵa tóraǵalyq jumysy barysynda atqarylǵan sharalar, bastamalar, usynystar uıym aıasynan shyǵyp, jahandyq sıpat alyp keledi. Qazaqstannyń qaı bastamalary bolsyn ortaq álem, ortaq úıimiz turǵysynan kóterilip, senim, dástúr, ashyqtyq, tózimdilik syndy tórt tuǵyr aýqymynda júrgizilýde», - deıdi.

***

Senattyń keshegi plenarlyq otyrysynda halyq qalaýlylarynyń birli-jarymy shý shyǵarǵany bolmasa, aınalasy bir saǵattyń ishinde bes birdeı zańnyń qııýy kelisip ketti. Partalaryna kóńildi kelip jaıǵasqan senat depýtattary Aral taǵdyrynan bastap, halyqaralyq mańyzy bar birneshe konventsııa men onyń hattamasyn ratıfıkatsııalaý týraly zańǵa belsene kiristi. Mundaı ónimdi otyrys san alýan pikirler arnasy toǵysyp jatatyn Parlament qabyrǵasynda jıi bola bermeıdi. Parlament otyrysyndaǵy qyzyq pikirtalas týraly «Alash aınasy» gazetindegi «Óli Aral sekýndyna 50 balyq jalmap jatyr» degen maqaladan bile alasyz.

Qazaq aqparat aıdynyna ózindik qoltańbasymen kelip qosylǵan «Habar» arnasyna da, mine, 15 jyl tolyp otyr. Árıne, bul bútindeı bir ulttyń tárbıe quraly bolǵan sala úshin az ýaqyt emes. Osy ýaqyt aralyǵynda jetekshilikke ıe bolǵan «Habar» agenttigi óz mıssııasyn qalaı atqaryp shyqty?. Neden utty, neden utyldy? «Habar» arnasynyń baǵdarlamalar dırektsııasynyń bas prodıýsseri Serik Abas-Shahpen suhbat basylymnyń «Dat!» aıdarynda «Elimizde tek qana memlekettik tilde sóıleıtin salmaqty telearnanyń joqtyǵynyń ózi - kemshilik» degen taqyryppen jarııalandy. Sondaı-aq osy basylymda «Habar» telearnasyna tutas bir bet arnalyp, onda «Habar» agenttigi bas prodıýseriniń orynbasary Arman Sqabyluly, jýrnalıst Dana Nurjigit jáne mýzykalyq redaktor Saǵatbek Qalıev telearnanyń qaz basqan kezindegi oqıǵalardy eske alady.

***

«Memleket basshysy Nursultan Nazarbaev Iordanııa Parlamenti Senatynyń Tóraǵasy Taher ál-Masrıdi qabyldady», dep jazady «Kazahstanskaıa pravda» gazeti. Kezdesý barysynda eki jaqty ekonomıkalyq yntymaqtastyqty damytý jáne parlamentaralyq baılanystardy nyǵaıtý máseleleri talqylanyp, Senat Tóraǵasy Nursultan Nazarbaevqa Iordanııa Koroli Abdalla II-niń sálemin jetkizgen. Sondaı-aq jýrnalısterge arnalǵan brıfıngte Taher ál-Masrı Nursultan Nazarbaevtyń basshylyǵymen Qazaqstannyń damý deńgeıine joǵary baǵa bere kelip: «Qazaqstan Batys pen Shyǵys arasyn baılanystyratyn kópirge aınalýda. El tynyshtyq pen turaqtylyqty saqtaý isine orasan kúsh-jigerin jumsaýda. Qazaqstan kelesi jyly Islam Konferentsııasy Uıymyna tóraǵalyq jasaıdy jáne bul Prezıdent Nursultan Nazarbaevtyń úlken eńbegi. Nursultan Nazarbaevtyń kóshbasshylyǵy men bastamalary tek Qazaqstanda ǵana emes, álemdik deńgeıde baǵalanýda», - deıdi.