EQYU elderiniń parlamentshileri Qazaqstannyń tranzıttik-kóliktik áleýetti damytý bastamasyn qoldady

ASTANA. QazAqparat - EQYU-ǵa múshe elderdiń parlamentshileri tranzıttik-kóliktik áleýetti damytý jónindegi qazaqstandyq bastamaǵa qoldaý bildirdi, dep habarlaıdy QazAqparat.

EQYU Parlamenttik Assambleıasy Ázerbaıjan Respýblıkasynyń Mıllı Májilisimen birlesip, Baký qalasynda «Ulttyq parlamentterdiń «jasyl» ekonomıka, ózara baılanys jáne ornyqty damý arqyly qaýipsizdik pen turaqtylyqty qamtamasyz etýdegi róli» atty halyqaralyq konferentsııa ótkizdi.

Oǵan birqatar elderdiń parlament basshylary, Ázerbaıjan Úkimetiniń músheleri, sondaı-aq EQYU PA Tóraǵasy Margareta Sederfelt jáne Uıymnyń Bas hatshysy Roberto Montella qatysty.

EQYU parlamentshileri halyqaralyq tasymaldar men saýdaǵa járdemdesý esebinen jetkizýdegi turaqtylyqty arttyrýdyń ózekti máselelerin, sondaı-aq ornyqty damý men ekonomıkany qalpyna keltirýdegi jasyl tujyrymdamalar men tehnologııalardyń rólin talqylady.

Konferentsııaǵa tóraǵalyq etken EQYU Parlamenttik Assambleıasy Tóraǵasynyń orynbasary, Ornyqty damý salasyndaǵy maqsattar jónindegi Assambleıanyń arnaıy ýákili Asqar Shákirov álem sońǵy onjyldyqtarda qaýipsizdik salasynda eleýli daǵdarysqa tap bolǵanyn atap ótti.

Pandemııa, qaqtyǵystar, klımatqa tótenshe áser etý men tabıǵı apattar saldarynan jahandyq jetkizý tizbegine kelgen zalal EQYU parlamentshilerine shuǵyl túrdegi ujymdyq jumys júrgizý qajettigin, sondaı-aq osy kúsh-jigerdi Ornyqty damý maqsattaryna qol jetkizýmen úılestirýdiń mańyzdylyǵyn aıqyn kórsetti.

«Bizdiń parlamentshi retindegi mıssııamyz – osy nıetterdi alysty kózdeıtin naqty ulttyq saıasatqa aınaldyrý, qajetti resýrstardy jumyldyrý jáne úkimetterimizdiń esep berýin qamtamasyz etý», - dep atap ótti qazaqstandyq senator.

Konferentsııa alańy EQYU parlamentshilerine pikir almasýǵa jáne EQYU aımaǵyndaǵy ornyqty damý men ózara baılanys salasyndaǵy úzdik tájirıbelerdi talqylaýǵa múmkindik berip otyr.

Konferentsııaǵa qatysýshylar Qazaqstan Prezıdenti Qasym-Jomart Toqaevtyń Azııadaǵy ózara is-qımyl jáne senim sharalary jónindegi keńes aıasynda qatysýshy elderiniń tranzıttik-kóliktik áleýetin tıimdi damytý maqsatynda Ózara ornyqty baılanys jónindegi keńes qurý týraly bastamasyn quptady.

Talqylaý barysynda ózara baılanysty jáne ornyqty jahandyq ekonomıkany damytý úshin tıimdi tranzıt dálizin qalyptastyrýdyń mańyzdylyǵy, sondaı-aq EQYU óńirindegi turaqtylyq pen qaýipsizdik quraly retinde Transkaspıı halyqaralyq kólik dálizin damytýdyń ózektiligi atap ótildi.