EQYU elderine Elbasynyń lańkestikke qarsy bastamalary usynyldy

ASTANA. QazAqparat - 11 shildede Qazaqstan Respýblıkasynyń Syrtqy ister mınıstri Qaırat Ábdirahmanov Eýropadaǵy qaýipsizdik jáne yntymaqtastyq uıymynyń (EQYU) Mınıstrler jınalysynyń jumysyna qatysty. Onyń barysynda EQYU-ǵa qatysýshy-memleketter delegatsııalarymen ózekti máselelerdi talqylady, dep habarlaıdy QazAqparat QR SІM-ge silteme jasap.

Plenarlyq sessııa barysynda Qazaqstan delegatsııasynyń basshysy EQYU-nyń is basyndaǵy tóraǵasy Avstrııa eline qoldaý bildire otyryp, QR Prezıdenti Nursultan Nazarbaevtyń bastamasymen shaqyrylǵan 2010 jylǵy EQYU Sammıtiniń Astana deklaratsııasynda bekitilgendeı, tutas jáne ajyramas Eýro-Atlantıkalyq jáne Eýrazııalyq qaýipsizdik qaýymdastyǵyn ilgeriletýge baǵyttalǵan ınklıýzıvti dıalogtyń mańyzdylyǵyn atap ótti. 

QR Syrtqy ister mınıstri lańkestikke alyp keletin zorlyq-zombylyq ekstremızminiń aldyn alýǵa arnalǵan «dóńgelek ústelde» Jahandyq lańkestikke qarsy kúres koalıtsııasy (jeli), BUU jahandyq lańkestikpen kúres strategııasy, Lańkestik pen zorlyq-zombylyq ekstremızmine qarsy jahandyq is-áreket kodeksi men Lańkestik uıymdardyń tutas tizimin qurý týraly Elbasynyń bastamalaryn usyndy. Sonymen birge, Qazaqstannyń lańkestikke qarsy kúres boıynsha sharalary, úshinshi jáne qoǵamdyq sanany jańǵyrtý baǵdarlamalary men «Kıber qalqan» bastamasy jóninde maǵlumat berdi.

Budan bólek, EQYU-ǵa qatysýshy-memleketterge Qazaqstannyń 2018 jyldyń qańtarynda BUU Qaýipsizdik Keńesine tóraǵalyǵyna daıyndyǵy jáne Astanada ótetin kezekti Álemdik jáne dástúrli dinder sezi týraly aqparat berildi.

Іssapar barysynda Q. Ábdirahmanov EQYU-nyń is basyndaǵy tóraǵa eli Avstrııa Syrtqy ister mınıstri Sebastıan Kýrtspen ekijaqty kelissózder ótkizdi.

Odan bólek, Q. Ábdirahmanov Eýropa odaǵy, Irlandııa, Slovakııa, Kanada jáne Kıprdiń delegatsııa basshylarymen bolǵan kezdesýler barysynda ekijaqty jáne kópjaqty yntymaqtastyq máselelerin talqylady.  Kelissózderdiń kún tártibinde ekonomıkalyq dıplomatııa erekshe oryn aldy: ınvestıtsııa tartý, saýda aınalymynyń ósýi, tranzıttik-kólik áleýetiniń júzege asyrylýy. Qazaqstan tarapy óz áriptesterin «EKSPO-2017» negizinde qurylatyn Astana halyqaralyq qarjy ortalyǵy, «Bolashaq energııasy» «jasyl» tehnologııalar jáne ınvestıtsııalyq jobalardy damytý halyqaralyq ortalyǵy men IT-startap habynyń jumysyna qatysýǵa shaqyrdy.

Qazaqstan syrtqysaıası vedomstvo basshysynyń Venaǵa is-sapary men EQYU debattaryna qatysýy beıbitshilik, qaýipsizdik pen turaqty damýǵa baǵyttalǵan QR Prezıdenti bastamalarynyń ózektiligi men qajettiligin kórsetti.