EQYU-dyń qazirgi tóraǵasy Q.Saýdabaevtyń Ázirbaıjan syrtqy ister mınıstrimen kezdesýi ótti
BAKÝ. Aqpannyń 15-i. QazAqparat /Arnur Muhametkárim/ - Eýropadaǵy qaýipsizdik jáne yntymaqtastyq uıymynyń qazirgi tóraǵasy, QR Memlekettik hatshysy-Syrtqy ister mınıstri Qanat Saýdabaev Ońtústik Kavkaz elderine sapary aıasynda Bakýde Ázirbaıjan syrtqy ister mınıstri Elmar Mamedıarovpen kezdesti.
Kezdesýden keıin eki el syrtqy ister vedomstvo basshylarynyń shaǵyn quramyndaǵy júzdesýinen soń keńeıtilgen quramda kelissózder ótti. Kelissózder barysynda Taýly Qarabaq janjalyn retteý máseleleriniń barlyq qyrlary talqylandy.
Baspasóz máslıhatynyń barysynda Q.Saýdabaev ázirbaıjandyq tarapqa EQYU tóraǵalyǵyna Qazaqstannyń kandıdatýrasyn jáne Memleket basshysynyń Uıym sammıtin ótkizý jónindegi bastamasyn qoldaǵany úshin alǵysyn bildirdi, aımaqqa óz saparynyń maqsaty týraly áńgimelep berdi.
Onyń aıtýynsha, EQYU sońǵy sammıti budan 11 jyl buryn Stambýlda ótken jáne osy ýaqyt ishinde Uıym tarapynan búgingi kúni tıisti kóńil bólýdi talap etetin álemde kóptegen qaterler paıda bolǵan.
«Kórsetilgen problemalardyń ishinde uzaqqa sozylǵan Taýly Qarabaq janjalyn retteý máseleleri mańyzdy oryn alady, - dep habarlady Q.Saýdabaev. - Meniń saparymnyń basty maqsaty - oryn alyp otyrǵan máselelerdiń barlyq túrlerin óz kózimmen kórý. Osyǵan baılanysty Qazaqstan úshin osy problemany retteý eń mańyzdy basymdyqtardyń biri bolyp tabylady. Óıtkeni Nursultan Nazarbaev bul problemamen onyń týyndaǵan sátinen bastap aınalysyp keledi», - dedi EQYU-nyń qazirgi tóraǵasy.
Q.Saýdabaevtyń aıtýynsha, osyǵan baılanysty bıylǵy jyly Taýly Qarabaq janjalyn retteý máselelerine laıyqty úles qosý úshin janjaldasýshy taraptardy tyńdaǵan óte mańyzdy.
«Meniń áriptesim Elmar Mamedıarovpen arada óte syndarly kelissóz boldy, taǵy alda prezıdent Ilham Álıevpen mańyzdy kezdesý kútip tur», - dedi Q.Saýdabaev.
