EQYU/DIAQB baqylaýshylar mıssııasynyń basshysy Qazaqstanmen yntymaqtastyqty oń baǵalaýda

NUR-SULTAN. QazAqparat - Nur-Sultan qalasynda Syrtqy ister mınıstri Beıbit Atamqulov Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar jáne adam quqyqtary jónindegi bıýrosynyń (EQYU/DIAQB) Qazaqstandaǵy saılaýdy baqylaý jónindegi mıssııasynyń basshysy Ýrshýla Gatsekpen kezdesti, dep habarlaıdy QazAqparat QR SІM baspasóz qyzmetine silteme jasap.

Syrtqy saıası vedomstvosynyń basshysy elimizdiń QR saıasatynyń sabaqtastyǵyn, boljamdylyǵyn jáne turaqtylyǵyn, el basshylyǵynyń demokratııalyq qundylyqtarǵa, adal, ashyq jáne ádil saılaý ótkizýge berik beıildiligin atap ótti. B. Atamqulov jeti kandıdatty, onyń ishinde áıel adam bar ekenin aıta kele, el úshin buryn-sońdy bolmaǵan saılaý naýqanynyń básekelestik sıpatyn atap ótti.

7 mamyrda Varshavadaǵy EQYU DIAQB dırektory Ingıberg Gısladottırmen óziniń jemisti kezdesýin eske sala otyryp, SІM basshysy Qazaqstan tarapynyń saılaýdy baqylaý protsesinde EQYU/DIAQB mıssııasyna barlyq qajetti járdem kórsetýge daıyn ekendigin jáne budan ári barlyq qajetti kómek kórsetýge daıyn ekendin jetkizdi.

Jyly jáne syndarly atmosferada ótken múddeli áńgimelesý barysynda Ý. Gatsek ózi basqaratyn mıssııanyń Qazaqstannyń memlekettik organdarymen, eń aldymen Ortalyq saılaý komıssııasy jáne Syrtqy ister mınıstrligimen osy kezeńdegi EQYU/DIAQB mıssııasynyń jumysyn uıymdastyrý jónindegi yntymaqtastyǵyna oń baǵa berdi.

Mıssııa basshysy shtabty qamtıtyn ózi basqaratyn mıssııa, 22 uzaq merzimdi jáne kútilip otyrǵandaı 300 qysqa merzimdi baqylaýshylar, EQYU-ǵa qatysýshy barlyq memleketterde DIAQB qoldanatyn biryńǵaı ólshemderge sáıkes elektoraldy protsesti jan-jaqty, ádil jáne tıimdi baǵalaıtynyna senim bildirdi.

Ý. Gatsek tolyq ashyqtyq rýhynda áreket ete otyryp, prezıdenttikke barlyq kandıdattarmen jáne olardyń shtabtarynyń basshylarymen kezdesýler ótkizýdi josparlap otyrǵanyn habarlady. Polshadaǵy saılaý naýqanyna eldiń ulttyq Parlamentine jáne Eýropalyq Parlamentke tabysty qatysqan, sondaı-aq birqatar elderde DIAQB saılaýdy baqylaý jónindegi mıssııalarǵa basshylyq etken tájirıbeli dıplomat pen saıasatker jınalǵan tájirıbe oǵan saılaýdy jan-jaqty jáne obektıvti baǵalaýǵa múmkindik beretinin atap ótti.

Ótken aptada Qazaqstanǵa alǵash ret kelgen Ý. Gatsek sondaı-aq Nur-Sultannan alǵan áserlerimen jáne ol týraly keńirek jáne tereń túsinik qalyptastyrý maqsatynda elde bolǵan kezeńde ártúrli óńirlerge barý josparlarymen bólisti.

Jalpy, SІM halyqaralyq uıymdarmen jáne shet elderdiń Ortalyq saılaý komıssııalarymen Qazaqstandaǵy prezıdenttik saılaýǵa baqylaýshylardy jiberý máselesi boıynsha belsendi jumysyn jalǵasýda. EQYU-dan basqa, Qazaqstanda TMD, Islam yntymaqtastyq uıymy, Shanhaı yntymaqtastyq uıymy, Túrkitildes memleketterdiń yntymaqtastyq keńesi, TúrkPA sııaqty halyqaralyq uıymdardan baqylaýshylar mıssııasyn kútýde.

Aıta keterligi, DIAQB mindetteri adam quqyqtaryn saqtaý monıtorıngi, demokratııany damytý jáne EQYU keńistiginde zańnyń ústemdigin bekitý bolyp tabylady. Uıymnyń quzyretine sondaı-aq saılaýdy halyqaralyq baqylaý, saraptamalyq derekterdi usyný jáne praktıkalyq qoldaý kórsetý jolymen Adamı ólshem boıynsha mindettemelerdi oryndaýǵa járdemdesý, tózimdilik pen kemsitpeýshilik salasyndaǵy ámbebap kún tártibin ilgeriletý kiredi.