EQYU baıqaýshylarynyń mıssııasy: Qazaqstandaǵy prezıdenttik saılaý sátti ótti

NUR-SULTAN. QazAqparat - Syrtqy ister mınıstri Beıbit Atamqulov Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar jáne adam quqyqtary jónindegi bıýrosynyń (EQYU DIAQB) dırektory Ingıberg Gısladottır, EQYU PA baıqaýshylar mıssııasynyń basshysy - EQYU PA Demokratııa, adam quqyqtary jáne gýmanıtarlyq máseleler jónindegi komıtetiniń tóraıymy Margaret Kıner-Nellen jáne EQYU/DIAQB baqylaýshylar mıssııasynyń basshysy Ýrshýla Gatsekpen kezdesý ótkizdi.

Bul týraly QR SІM baspasóz qyzmeti habarlaıdy.

Kelissózderdiń basty taqyryby Qazaqstan Respýblıkasy Prezıdentiniń kezekten tys saılaýyn baıqaý jónindegi EQYU mıssııasynyń jumysy boldy. Kezdesý dostyq jáne syndarly atmosferada ótti.

Mınıstr tarıhı ólshem boıynsha az ýaqyt ishinde bizdiń elimiz kóptegen jetistikterge qol jetkizgenin atap ótti. Ekonomıka nyǵaıyp, halyqtyń tabysy ósti, bizdiń qoǵam turaqtylyq pen tózimdilik úlgisi retinde qarastyrylady, respýblıka saıası damýdyń jańa kezeńine shyqty. Azamattardyń erkin bildirý úderisi zańnamaǵa jáne qabyldanǵan halyqaralyq mindettemelerge tolyq sáıkes adal, ashyq jáne ádil ótti.

EQYU/DIAQB basshysy kezekten tys prezıdenttik saılaýdyń tabysty ótýimen quttyqtap, mıssııa jumysy úshin barynsha qolaıly jaǵdaı jasalǵany úshin alǵys bildirdi. DIAQB basshysynyń pikirinshe, Qazaqstandaǵy saılaý aldyndaǵy naýqan is júzinde esh buzýshylyqsyz júrgizildi. Sonymen qatar, ol qazaqstandyq bılik ókilderiniń baıandamany syndarly qabyldaýyn jáne júıeni odan ári jetildirý týraly josparlaryn atap ótti. «Keıbir úkimetter osyndaı esepterdi esh qabyldamaıdy. Islandııada «Dos árqashan saǵan shyndyqty aıtady, al jaý bári jaqsy dep aıtady» degen maqal bar», - dedi DIAQB dırektory.

Óz kezeginde SІM basshysy qazaq tilinde «Dos jylatyp aıtady, dushpan kúldirip aıtady» degen maqal bar ekenin aıtty. Ol QR Úkimeti saılaý qorytyndysy boıynsha málimdemede kórsetilgen eskertýler men usynystardy nazarǵa alatynyn jetkizdi.

«Biz jańadan saılanǵan Prezıdentti saılaýdaǵy jeńisimen quttyqtaımyz. Eń bastysy - bizde sizdiń Úkimetpen dıalog bar», - dedi EQYU PA baqylaýshylar mıssııasynyń basshysy M. Kıner-Nellen. Onyń aıtýynsha, baqylaýshylardyń jergilikti bılikpen ózara is-qımyly óte syndarly boldy, sondyqtan ol ári qaraı jemisti yntymaqtastyqqa úmit bildirdi.

Saılaýdy baqylaýǵa toǵyz júzden astam halyqaralyq baqylaýshy qatysty. Atap aıtqanda, 9 halyqaralyq uıymnan 866 baqylaýshy keldi. Álemniń 40-tan astam elinen 227 sheteldik tilshi men jýrnalıst akkredıtteldi, bul saılaýdy ótkizý tarıhynda respýblıka úshin rekordtyq kórsetkish boldy.