EQYU aıasynda burynnan qalyptasqan qundylyqtardyń mańyzy joıylmaı, kún saıyn artyp keledi - H. Klınton
ASTANA. 30 qarasha. QazAqparat /Qanat Mámetqazyuly/ - EQYU aıasynda burynnan qalyptasqan qundylyqtardyń búgingi kúni de mańyzy joıylǵan joq. Kerisinshe, olardyń mańyzdylyǵy kún saıyn artyp otyr.
Búgin Astana Sammıtine qatysý úshin elimizge resmı saparmen kelgen AQSh Memlekettik hatshysy Hılları Klınton elordadaǵy Eýrazııa ulttyq ýnıversıtetinde stýdenttermen, jergilikti jáne halyqaralyq úkimettik emes uıym ókilderimen kezdesýi barysynda osylaı málim etti.
«Jalpy, EQYU men úshin de, bizdiń memleketimiz úshin de basym mańyzdyq beretin uıym bolyp tabylady. Shynymen, 1993 jyly meniń joldasym AQSh Prezıdenti bolyp turǵan kezde EQYU bizdiń halyqaralyq saıasatymyzdyń mańyzdy bóligi bolǵan edi. Bul baǵytty B. Obama Ákimshiligi de qoldap, men de EQYU-ǵa qatysty óz mindettemelerimdi bekite túsetin qadamdar jasadym. Sondyqtan da, men Astanaǵa kelip otyrmyn», - dedi kezdesýge qatysýshylardyń saýalyna jaýap bere kele H. Klınton. Sonymen birge, AQSh Memlekettik hatshysy uıym aıasynda qolǵa alynǵan úlken sharalarǵa toqtala otyryp, EQYU aıasynda burynnan qalyptasqan qundylyqtardyń búgingi kúni de mańyzyn joımaǵanyn, kerisinshe olardyń mańyzdylyǵy artyp otyrǵanyn atap ótti. Onyń pikirinshe, EQYU baǵyty - bul AQSh-tyń halyqaralyq saıasatynyń bir bóligi bolyp tabylady. «Biz EQYU sekildi kópjaqty halyqaralyq uıymdarǵa jan-jaqty qoldaý bildirý úshin barlyq jaǵdaıdy jasaımyz. Jalpylama alǵanda, EQYU aıasynda kúresip júrgen qıyn mindetter barshylyq. Bunda eń birinshi nazar aýdaratyn másele -EQYU qujatyn qoldaǵan barlyq memleketter ony qoldaýdy jalǵastyra berýleri shart. Sondyqtan da, biz EQYU-nyń budan da belsendi bolǵanyn jáne Uıym qataryna kirý barysynda mindettemelerdi oryndaýǵa ýaǵdalasqan elderdiń óz ýádelerinde turǵanyn qalaımyz. Árıne, EQYU erikti uıym. Árbir memleket erikti túrde osy uıymǵa qosylady. Alaıda, keıinnen aıaq astynan qandaı da bir qujatty qoldamaı shyqsa, onda sol memleket osyndaı uıymǵa ne úshin qabyldanatyny túsiniksiz? Sondyqtan da, biz EQYU rólin jáne oǵan múshe memleketterdiń Helsınkıı qujatyn oryndaýy qajettigin atap ótkimiz keledi. HHІ ǵasyrda jetistikke jetýge umtylǵan memleket adam quqyn qorǵaýdaǵy barlyq sharalardy oryndaýy qajet», dedi H. Klınton.
