Ekvatorlyq Gvıneıada qarý-jaraq qoımasy jaryldy, eń kemi 20 adam qaza tapqan
NUR-SULTAN. QazAqparat – Ekvatorlyq Gvıneıada iri porttyq qala Batada áskerı baza jaryldy, saldarynan kem degende 20 adam qaza taýyp, 600-den astam adam jaraqat aldy, dep habarlaıdy QazAqparat Euronews-ke silteme jasap.
Kóptegen ǵımarattar tolyǵymen qıraǵan, qalǵandarynyń shatyryna zaqym kelgen. Ondaǵan adam iz-túzsiz joǵalǵandar sanatynda.
«Jeksenbi kúni keshke eldegi qorǵanys mınıstrligi qarý-jaraq qoımasyndaǵy órttiń iri kalıbrli oq-dárilerdiń jarylýyna ákep soqqanyn málimdedi. Epıtsentrde áskerı kazarmalar bolǵan. Al syrtqy ister mınıstri prezıdenttiń kelisimimen kórshi elderden kómek surady. Jergilikti dárigerlerdiń aıtýynsha, bul jarylystar barlyq aýrýhanalardyń koronavırýs naýqastaryna toly kezinde bolyp otyr. Densaýlyq saqtaý mınıstrligi turǵyndardy jaralylarǵa qan tapsyrýǵa, al medıtsına qyzmetkerlerin aımaqtyq aýrýhanadaǵy áriptesterin zardap shekkenderdi kútip-baptaýǵa kómektesýge shaqyrdy», - dep jazdy Euronews.
Ekvatorlyq Gvıneıa prezıdenti bolǵan oqıǵaǵa áskerılerdi aıyptady. Respýblıka basshysynyń aıtýynsha, olardyń nemquraılyǵy men salǵyrttyǵy adamdardyń ólimine ákep soqty. Qaıǵyly oqıǵaǵa oq-dárilerdi, dınamıtti jáne basqa jarylǵysh zattardy saqtaýǵa jaýapty bólimsheniń qyzmetkerleri aıyptaldy.
